លោក ពូទីន បញ្ជាក់ថារុស្ស៊ីកំពុងរង់ចាំដំណើរទស្សនកិច្ចរបស់សមភាគីចិន លោក ស៊ី ជីនពីង

បរទេស៖ ប្រធានាធិបតីរុស្ស៊ី លោក វ្ល៉ាឌីមៀរ ពូទីន (Vladimir Putin) បានបញ្ជាក់ថា ប្រទេសរុស្ស៊ីកំពុងរង់ចាំដំណើរទស្សនកិច្ចរបស់សមភាគីចិន លោក ស៊ី ជីនពីង (Xi Jinping)។

លោក ពូទីន បាននិយាយខណៈដែលលោកបានស្វាគមន៍នាយកការិយាល័យនៃគណៈកម្មាធិការកិច្ចការបរទេសមជ្ឈិមនៃបក្សកុម្មុយនិស្តចិន (CCP) និងជាសមាជិកនៃគណៈកម្មាធិកា ការិយាល័យនយោបាយ CCP លោក វ៉ាង យី (Wang Yi) នៅវិមានក្រឹមឡាំងកាលពីថ្ងៃពុធថា «យើងកំពុងរំពឹងថា ប្រធានាធិបតីនៃសាធារណរដ្ឋប្រជាមានិតចិននឹងធ្វើទស្សនកិច្ចនៅប្រទេសរុស្ស៊ី។ យើងបានព្រមព្រៀងចំពោះរឿងនេះកាលពីមុន»។

ប្រធានាធិបតីរុស្ស៊ីបានកត់សម្គាល់ថា «យើងយល់ថា [ចិន] មានរបៀបវារៈនយោបាយក្នុងស្រុក ប៉ុន្តែយើងសន្មត់ថា នៅពេលយើងដោះស្រាយបញ្ហាទាំងអស់ដែលទាក់ទងនឹងរបៀបវារៈនេះជាមួយសភាប្រជាមានិត ដែលបង្កើតឡើងដោយសមាជិកសភាចិន ដែលត្រូវតែដោះស្រាយបញ្ហាសំខាន់ៗ ដោយយើងនឹងអនុវត្តផែនការរបស់យើងសម្រាប់កិច្ចប្រជុំផ្ទាល់ខ្លួនផងដែរ ដែលនឹងផ្តល់កម្លាំងចិត្តបន្ថែមដល់ទំនាក់ទំនងរបស់យើង»។

ដូចដែលត្រូវបានគេរាយការណ៍កាលពីមុន សម័យប្រជុំនៃស្ថាប័ននីតិប្បញ្ញត្តិខ្ពស់បំផុតនៃប្រទេសចិន សន្និសីទប្រឹក្សានយោបាយប្រជាជនចិន និងសភាប្រជាមានិត នឹងចាប់ផ្តើមនៅទីក្រុងប៉េកាំងនៅថ្ងៃទី៤ និងថ្ងៃទី៥ ខែមីនា។ សមាជិកសភានឹងពិភាក្សាគ្នាអំពីសមិទ្ធិផលសេដ្ឋកិច្ចសង្គម និងការរំពឹងទុកសម្រាប់ការអភិវឌ្ឍបន្ថែមទៀតរបស់ប្រទេស និងអនុម័តគម្រោងថ្មីៗ។

ទន្ទឹមនឹងនេះដែរ ការរុះរើជាបន្តបន្ទាប់នៅក្នុងមុខតំណែងសំខាន់ៗ និងមុខតំណែងរដ្ឋាភិបាលនៅក្នុងប្រទេសចិនត្រូវបានគ្រោងទុក។ ជាពិសេស លោក ស៊ី ជីនពីង ប្រធានាធិបតីចិនត្រូវបានគេរំពឹងថានឹងត្រូវជាប់ឆ្នោតឡើងវិញមួយអាណត្តិទៀត។ លើសពីនេះទៀត នាយករដ្ឋមន្ត្រីថ្មីនៃក្រុមប្រឹក្សារដ្ឋនឹងត្រូវបានជ្រើសរើស៕

ប្រភព៖ ក្រសួងព័ត៌មាន