បរទេស៖ ក្រសួងពាណិជ្ជកម្ម និងឧស្សាហកម្មអន្តរជាតិរបស់ម៉ាឡេស៊ី (MITI) បាននិយាយថា ពាណិជ្ជកម្មរបស់ប្រទេសនេះបានបន្តគន្លងកើនឡើងរបស់ខ្លួននៅក្នុងខែកញ្ញា ឆ្នាំ២០២២ ដោយកើនឡើងបាន ៣១,៤% ពីមួយឆ្នាំទៅមួយឆ្នាំដល់តម្លៃ ២៥៦,៩១ប៊ីលានរីងហ្គីត (៥៤,៤៣ប៊ីលានដុល្លារអាម៉េរិក) ដែលជាការកត់សម្គាល់ក្នុងរយៈពេល ២០ខែជាប់ៗគ្នានៃកំណើនពីរខ្ទង់។
ដូចដែលបានរាយការណ៍ដោយទីភ្នាក់ងារសារព័ត៌មានបឺរណាម៉ារបស់ប្រទេសនេះ ក្រសួងបាននិយាយថា ការនាំចេញបានកើនឡើង ៣០,១% ដល់តម្លៃ ១៤៤,៣១ប៊ីលានរីងហ្គីត ដែលជាការកត់សម្គាល់ក្នុងរយៈពេល ១៤ខែជាប់ៗគ្នានៃកំណើនពីរខ្ទង់ ខណៈដែលការនាំចូលកើនឡើង ៣៣% ដល់តម្លៃ ១១២,៦០ប៊ីលានរីងហ្គីត។ ជាលទ្ធផល អតិរេកពាណិជ្ជកម្មរបស់ម៉ាឡេស៊ីសម្រេចបាននូវកំណត់ត្រាខ្ពស់ថ្មីមួយ គឺ ៣១,៧១ប៊ីលានរីងហ្គីត។
ក្រសួង MITI បានចាត់ទុកកំណើននៃការនាំចេញភាគច្រើនត្រូវបានជំរុញដោយសារតម្រូវការខាងក្រៅដ៏រឹងមាំសម្រាប់ផលិតផលអគ្គិសនី និងអេឡិចត្រូនិច (E&E) ផលិតផលប្រេង ឧស្ម័នធម្មជាតិរាវ (LNG) ប្រេងឆៅ ឧបករណ៍អុបទិក និងវិទ្យាសាស្ត្រ ព្រមទាំងគ្រឿងម៉ាស៊ីន ឧបករណ៍ និងគ្រឿងបន្លាស់។
ការនាំចេញរបស់ប្រទេសម៉ាឡេស៊ីទៅកាន់ដៃគូពាណិជ្ជកម្មសំខាន់ៗ ជាពិសេសអាស៊ាន សហរដ្ឋអាមេរិក សហភាពអឺរ៉ុប និងជប៉ុន បានកត់ត្រានូវកំណើនពីរខ្ទង់ ដោយនៅក្នុងនោះ តួលេខសម្រាប់ប្រទេសជប៉ុនបានចុះបញ្ជីតម្លៃប្រចាំខែខ្ពស់បំផុតមិនធ្លាប់មាន៕
ប្រភព៖ ក្រសួងព័ត៌មាន
