បរទេស៖ កាលពីថ្ងៃសៅរ៍ នគរបាលនៅទីក្រុង Stockton រដ្ឋ California បាននិយាយថា បានចាប់ខ្លួនបុរសម្នាក់ដែលជាប់សង្ស័យពីបទសម្លាប់មនុស្សសរុបចំនួន ០៦នាក់ នៅក្នុងឃាតកម្មផ្សេងៗគ្នាជាច្រើនដែលបានធ្វើឲ្យកក្រើកនៅតំបន់ភាគខាងជើងរដ្ឋ California។
ស្នងការក្រុង Stockton លោក Stanley McFadden បាននិយាយថា អរគុណចំពោះការងារស្រាវជ្រាវ និងការស៊ើបអង្កេត ដែលអាចឲ្យក្រុមអាជ្ញាធរតាមស្វែងរកឃើញជនសង្ស័យម្នាក់នោះ និងបានឃាត់ដំណើរ ខណៈពេលដែលកំពុងបើកបរក្នុងទីក្រុងកាលពីព្រឹកថ្ងៃសៅរ៍។
លោក McFadden បាននិយាយនៅក្នុងសន្និសីទសារព័ត៌មានមួយថា ជនសង្ស័យស្លៀកពាក់ឈុតខ្មៅ មានរបាំងមុខជុំវិញក និងកាន់កាំភ្លើងនៅពេលដែលក្រុមស៊ើបអង្កេតបានបញ្ឈប់ឡាននោះ “អំឡុងពេលដែលជននោះកំពុងមានបំណងធ្វើឃាតកម្មមួយទៀត”។ លោកបានបន្ថែមទៀតថា “យើងប្រាកដថា យើងបានបញ្ឈប់ឃាតកម្មផ្សេងទៀត”។
លោក McFadden បានកំណត់អត្តសញ្ញាណជនសង្ស័យដែលមានឈ្មោះ Wesley Brownlee អាយុ ៤៣ឆ្នាំ។ កាលពីដើមខែនេះ ក្រុមអាជ្ញាធរបាននិយាយថា ការបាញ់ប្រហារទាំងនោះបានចាប់ផ្តើមកាលពីឆ្នាំមុន និងបន្តរហូតដល់ខែកញ្ញា ដែលការពិនិត្យបានបង្ហាញថាមានការជាប់ទាក់ទងគ្នា ដោយមានភ័ស្តុតាងនៃការប្រើប្រាស់អាវុធ ៕
ប្រភព៖ អគ្គស្នងការដ្ឋាននគរបាលជាតិ
