បរទេស៖ រដ្ឋមន្ត្រីក្រសួងហិរញ្ញវត្ថុរបស់កូរ៉េខាងត្បូង លោក Choo Kyung-ho បាននិយាយកាលពីថ្ងៃចន្ទថា អតិផរណាអ្នកប្រើប្រាស់របស់ប្រទេសកូរ៉េខាងត្បូងទំនងជានឹងឡើងដល់កម្រិតកំពូលនៅចុងត្រីមាសទី៣ ឬដើមត្រីមាសទី៤ ប្រសិនបើមិនមានការកើនឡើងយ៉ាងខ្លាំងនៃតម្លៃប្រេង និងគ្រាប់ធញ្ញជាតិពិភពលោក។
តម្លៃទំនិញប្រើប្រាស់អាចនឹងមានស្ថិរភាពគួរឱ្យកត់សម្គាល់ចាប់ពីខែតុលា ប្រសិនបើការប្រមូលផលកសិផលមិនត្រូវបានរារាំងដោយព្យុះទីហ្វុង បន្ទាប់ពីថ្ងៃឈប់សម្រាកប្រមូលផល (Chuseok) ដែលកំណត់នៅថ្ងៃទី៩-១២ ខែកញ្ញា។ នេះបើយោងតាមលោករដ្ឋមន្ត្រី។
លោក Choo បានប្រាប់អ្នកយកព័ត៌មានថា «ប្រសិនបើតម្លៃប្រេងបង្ហាញចលនាស្រដៀងគ្នាទៅនឹងនិន្នាការបច្ចុប្បន្ន តម្លៃអ្នកប្រើប្រាស់អាចនឹងឡើងដល់កំពូលមិនហួសពីក្នុងខែតុលាទេ»។
តម្លៃអ្នកប្រើប្រាស់បានកើនឡើង ៦ភាគរយនៅក្នុងខែមិថុនាបើធៀបទៅនឹងឆ្នាំមុន ដែលជាការកើនឡើងលឿនបំផុតក្នុងរយៈពេលជិត ២៤ឆ្នាំកន្លងមក និងការបង្កើនល្បឿនពីការកើនឡើង ៥,៤ ភាគរយក្នុងមួយឆ្នាំកាលពីក្នុងខែឧសភា។
អតិផរណារបស់ប្រទេសនេះស្ថិតនៅក្រោមសម្ពាធកើនឡើង ដោយសារតែតម្លៃប្រេង និងទំនិញកើនឡើង ដែលបណ្តាលមកពីសង្គ្រាមដែលអូសបន្លាយពេលរវាងរុស្ស៊ី និងអ៊ុយក្រែន។ ការងើបឡើងវិញនៃតម្រូវការពីជំងឺរាតត្បាតក៏ជំរុញឱ្យមានអតិផរណាផងដែរ។
រដ្ឋាភិបាលគ្រោងនឹងចេញវិធានការបន្ថែមមួយទៀតដើម្បីរក្សាស្ថិរភាពជីវភាពរស់របស់ប្រជាជន និងទប់ស្កាត់អតិផរណានៅខែក្រោយមុនថ្ងៃបុណ្យឈប់សម្រាបប្រមូលផល។
តម្រូវការបន្លែ ស៊ុត និងគ្រឿងឧបភោគបរិភោគផ្សេងៗទៀត ជាធម្មតាកើនឡើងនៅក្នុងប្រទេសកូរ៉េខាងត្បូងនៅមុនថ្ងៃបុណ្យចូលឆ្នាំចិន និងថ្ងៃបុណ្យប្រមូលផលចុងឆ្នាំ ខណៈដែលប្រជាជនរៀបចំអាហារថ្ងៃសម្រាកសម្រាប់ការជួបជុំគ្រួសារ។
ទន្ទឹមនឹងនេះដែរ លោក Choo បានច្រានចោលនូវការព្រួយបារម្ភថា អាចមានលំហូរចេញនៃមូលធនបរទេសដ៏ធំ ប្រសិនបើការរឹតបន្តឹងរូបិយវត្ថុដ៏ខ្លាំងក្លារបស់ទុនបម្រុងសហព័ន្ធដែលបណ្តាលឱ្យអត្រាការប្រាក់របស់សហរដ្ឋអាមេរិកនៅខ្ពស់ជាងអត្រាការប្រាក់របស់កូរ៉េខាងត្បូង៕
ប្រភព៖ ក្រសួងព័ត៌មាន
