បរទេស៖ ករណីឆ្លងថ្មីនៃជំងឺកូវីដ-១៩ របស់ប្រទេសកូរ៉េខាងត្បូងបានហក់ឡើងដល់ជាង ៧៣ ០០០នាក់កាលពីថ្ងៃអង្គារ ខណៈដែលប្រភេទរងនៃវីរុសបម្លែងថ្មីអូមីក្រុងដែលមានកម្រិតឆ្លងខ្លាំងកំពុងឆ្លងរាលដាលយ៉ាងឆាប់រហ័ស ចំពេលដែលកំពុងមានការបន្ធូរបន្ថយវិធានការទប់ស្កាត់។
ទីភ្នាក់ងារគ្រប់គ្រង និងបង្ការជំងឺកូរ៉េ (KDCA) បាននិយាយថា ប្រទេសនេះបានរាយការណ៍ពីករណីឆ្លងថ្មីនៃជំងឺកូវីដ-១៩ ចំនួន ៧៣ ៥៨២នាក់ ដោយក្នុងនោះមាន ៣៥១នាក់ជាករណីនាំចូលពីក្រៅប្រទេស ដែលនាំឱ្យចំនួនករណីសរុបកើនឡើងដល់ ១៨ ៨៦១ ៥៩៣នាក់។ តួលេខកាលពីថ្ងៃអង្គារបានកើនឡើងទ្វេដងពីចំនួន ១៦ ២៩៩នាក់កាលពីមួយថ្ងៃមុន។ ករណីឆ្លងប្រចាំថ្ងៃមានចំនួន ៤១ ៣១០នាក់កាលពីថ្ងៃសៅរ៍ និង ៤០ ៣៤២នាក់កាលពីថ្ងៃអាទិត្យ។
ប្រទេសនេះបានឃើញនូវការកើនឡើងគួរឱ្យកត់សម្គាល់នៃការឆ្លងចាប់ពីចុងខែមិថុនាមក ខណៈដែលវីរុសប្រភេទរង BA.5 នៃវីរុសបម្លែងថ្មីអូមីក្រុងមានការឆ្លងរាលដាលក្នុងអំឡុងពេលថ្ងៃឈប់សម្រាករដូវក្តៅ។ ការរាប់ប្រចាំថ្ងៃបានកើនឡើងដល់ជាង ១០ ០០០នាក់កាលពីថ្ងៃទី២៩ ខែមិថុនា ជាលើកដំបូងក្នុងរយៈពេលប្រហែល ៣សប្តាហ៍ មុនពេលកើនឡើងដល់ជាង ២០ ០០០នាក់កាលពីថ្ងៃទី៩ ខែកក្កដា និងបន្ទាប់មកមានលើសពី ៤០ ០០០នាក់កាលពីថ្ងៃពុធសប្តាហ៍មុន។
KDCA បានរាយការណ៍ពីករណីស្លាប់ដោយសារជំងឺកូវីដ-១៩ ចំនួន ១២នាក់កាលពីថ្ងៃអង្គារ ដែលធ្វើឱ្យចំនួនករណីស្លាប់សរុបមាន ២៤ ៧៦៥នាក់ ដោយអត្រាមរណភាពមានចំនួន ០,១៣ភាគរយ។ ចំនួនអ្នកជំងឺធ្ងន់ធ្ងរមានចំនួន ៩១នាក់ ដែលកើនពីមួយថ្ងៃមុនដែលមានចំនួន ៨១នាក់។
គិតត្រឹមម៉ោង ៩:០០យប់ថ្ងៃអង្គារ ប្រទេសនេះបានរាយការណ៍នូវករណីឆ្លងថ្មីបន្ថែមចំនួន ៧៣ ៣០១នាក់ដែលកើនឡើងពីមួយថ្ងៃមុនដែលមានចំនួន ៧០ ៤៩៧នាក់។ នេះបើយោងតាមរដ្ឋាភិបាលក្នុងតំបន់ និងអាជ្ញាធរសុខាភិបាល។ តួលេខកាលពីថ្ងៃអង្គារបានកើនឡើងជិតទ្វេដងធៀបនឹងរយៈពេលដែលបានកត់ត្រាកាលពីមួយសប្តាហ៍មុន។ ករណីឆ្លងប្រចាំថ្ងៃត្រូវបានរាប់រហូតដល់ពាក់កណ្តាលអធ្រាត្រ ហើយប្រកាសនៅព្រឹកបន្ទាប់៕
ប្រភព៖ ក្រសួងព័ត៌មាន
