បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី១ ខែមិថុនា ឆ្នាំ២០២២ បានអោយដឹងថាទូរទស្សន៍ SRF បានរាយការណ៍កាលពីថ្ងៃពុធថា រដ្ឋាភិបាលស្វីសបានធ្វើការបដិសេធលើសំណើរបស់ប្រទេសដាណឺម៉ាកក្នុងការផ្គត់ផ្គង់រថពាសដែកដែលផលិតដោយប្រទេសស្វីសទៅអោយអ៊ុយក្រែន ដោយលើកឡើងពីគោលនយោបាយអព្យាក្រឹតភាពរបស់ខ្លួន។
ទីក្រុង Copenhagen គ្រោងនឹងបរិច្ចាគរថពាសដែក Piranha III ដល់អ៊ុយក្រែន សម្រាប់ប្រើប្រាស់ក្នុងជម្លោះជាមួយរុស្ស៊ី។ យ៉ាងណាក៏ដោយ លេខាធិការដ្ឋានកិច្ចការសេដ្ឋកិច្ចរបស់ប្រទេសស្វ៊ីសបានធ្វើការច្រានចោលចំពោះសំណើរបញ្ជូនរថពាសដែក ២០ គ្រឿងទៅកាន់ទីក្រុងគៀវ។
កន្លងមក ប្រទេសដាណឺម៉ាកបានប្តេជ្ញាខ្លួនឯងថានឹងមិននាំចេញអាវុធដែលផលិតដោយស្វីសទៅប្រទេសផ្សេងទៀតដោយគ្មានការយល់ព្រមពី Bern ៕
