បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី៣០ ខែមេសា ឆ្នាំ២០២២ បានអោយដឹងថាប្រធានាធិបតីបារាំង លោក Emmanuel Macron បានសន្យាជាមួយប្រធានាធិបតីអ៊ុយក្រែនលោក Volodymyr Zelensky ថា ប្រទេសបារាំងនឹង “ពង្រឹង” ទាំងជំនួយយោធា និងមនុស្សធម៌ដល់ទីក្រុងគៀវ។
វិមាន Elysee បាននិយាយនៅក្នុងសេចក្តីថ្លែងការណ៍មួយថា ក្នុងអំឡុងពេលសន្ទនាតាមទូរស័ព្ទកាលពីថ្ងៃសៅរ៍ កន្លងមក បន្ទាប់ពីការបោះឆ្នោតលើកទី២ លោក Zelensky បានថ្លែងអំណរគុណដល់មេដឹកនាំបារាំងដែលបានផ្តល់ឱ្យអ៊ុយក្រែននូវឧបករណ៍យោធា “សំខាន់ៗ” ដែល “បានរួមចំណែកដល់ការតស៊ូរបស់អ៊ុយក្រែន” ។
លោក Macron “បានបង្ហាញថា ការគាំទ្រនេះនឹងបន្តត្រូវបានពង្រឹងដូចនឹងជំនួយមនុស្សធម៌ដែលផ្តល់ដោយប្រទេសបារាំង”។ ការិយាល័យប្រធានាធិបតីបានកត់សម្គាល់ថា ប្រទេសបារាំងបានផ្តល់ឱ្យអ៊ុយក្រែននូវ “ឧបករណ៍ជាង ៦១៥តោន រួមទាំងឧបករណ៍វេជ្ជសាស្ត្រ ម៉ាស៊ីនភ្លើងសម្រាប់មន្ទីរពេទ្យ អាហារ សម្ភារៈប្រើប្រាស់ក្នុងផ្ទះ និងរថយន្តសង្គ្រោះបន្ទាន់”៕
