បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី២៨ ខែមេសា ឆ្នាំ២០២២ បានអោយដឹងថា ប្រធានាធិបតីអាមេរិកលោក Joe Biden បានស្នើឱ្យសភាផ្តល់មូលនិធិបន្ថែមចំនួន ៣៣ ពាន់លានដុល្លារ ដើម្បីគាំទ្រអ៊ុយក្រែនក្នុងជម្លោះដែលកំពុងបន្តជាមួយរុស្ស៊ី។ មួយផ្នែកធំនៃកញ្ចប់ថវិកាត្រូវបានកំណត់សម្រាប់ជំនួយផ្នែកយោធា និងសន្តិសុខបន្ថែម ខណៈដែលនៅសល់នឹងត្រូវប្រើប្រាស់សម្រាប់ជំនួយផ្នែកសេដ្ឋកិច្ច និងមនុស្សធម៌។
សេតវិមានបាននិយាយនៅក្នុងសេចក្តីថ្លែងការណ៍មួយថា “រដ្ឋបាលកំពុងស្នើសុំ ២០.៤ ពាន់លានដុល្លារជាជំនួយផ្នែកសន្តិសុខ និងយោធាបន្ថែមសម្រាប់អ៊ុយក្រែន និងសម្រាប់កិច្ចខិតខំប្រឹងប្រែងរបស់សហរដ្ឋអាមេរិកក្នុងការពង្រឹងសន្តិសុខក្នុងតំបន់អឺរ៉ុបក្នុងកិច្ចសហប្រតិបត្តិការជាមួយសម្ព័ន្ធមិត្តណាតូរបស់យើង និងដៃគូផ្សេងទៀតនៅក្នុងតំបន់”៕
