បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី៣ ខែមេសា ឆ្នាំ២០២២ បានអោយដឹងថាមេដឹកនាំកំពូលប៉ូឡូញបានអំពាវនាវឱ្យសហរដ្ឋអាមេរិកបន្ថែមកងទ័ពរបស់ខ្លួនមកក្នុងទ្វីបអឺរ៉ុប ដើម្បីដាក់ពង្រាយនៅតាមព្រំដែនរបស់រុស្ស៊ី និងអនុញ្ញាតអោយដំឡើងអាវុធនុយក្លេអ៊ែរនៅក្នុងប្រទេសប៉ូឡូញផងដែរ។
លោកឧបនាយករដ្ឋមន្ត្រី Jaroslaw Kaczynski បាននិយាយនៅក្នុងបទសម្ភាសមួយដែលបានចេញផ្សាយកាលពីថ្ងៃអាទិត្យដោយកាសែតអាល្លឺម៉ង់ Welt am Sonntag ថា “ប៉ូឡូញនឹងរីករាយប្រសិនបើកងទ័ពអាមេរិកបង្កើនវត្តមានរបស់ពួកគេនៅក្នុងទ្វីបអឺរ៉ុបពីទាហាន ១០០០០០នាក់នាពេលបច្ចុប្បន្ន ទៅជា ១៥០០០០ នាក់នាពេលអនាគត”។
លោកឧបនាយករដ្ឋមន្ត្រី Jaroslaw Kaczynski ដែលជាប្រធានគណបក្សនយោបាយដែលកំពុងកាន់អំណាចរបស់ប្រទេសប៉ូឡូញ បាននិយាយថា ទាហាន ៧៥០០០នាក់ របស់វ៉ាស៊ីនតោននៅក្នុងទ្វីបអឺរ៉ុបគួរតែឈរជើងជាអចិន្ត្រៃយ៍នៅលើភាគខាងកើតរបស់អង្គការ NATO តាមបណ្តោយព្រំដែនជាមួយប្រទេសរុស្ស៊ី។
គួរបញ្ជាក់ថាការដាក់ពង្រាយទាហានទាំងនោះនឹងជិតស្មើរទៅនឹងទាហានអាមេរិកដែលមានចំនួនប្រមាណ ៨០០០០នាក់ ដែលអាមេរិកបានដាក់អោយឈរជើងនៅអឺរ៉ុបទាំងអស់ មុនពេលដែលទីក្រុងម៉ូស្គូចាប់ផ្តើមការវាយលុកយោធាប្រឆាំងនឹងអ៊ុយក្រែនក្នុងខែកុម្ភៈ៕
