បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី១ ខែមេសា ឆ្នាំ២០២២ បានអោយដឹងថា អ្នកនាំពាក្យសេតវិមានលោកស្រី Jen Psaki បានបញ្ជាក់ថា សហរដ្ឋអាមេរិកកំពុងត្រៀមលក្ខណៈសម្រាប់លទ្ធភាពដែលរុស្ស៊ីអាចប្រើប្រាស់អាវុធគីមី ឬជីវសាស្ត្រប្រឆាំងនឹងអ៊ុយក្រែន។ ក្នុងនោះសហរដ្ឋអាមេរិកបានផ្តល់ឧបករណ៍ និងការផ្គត់ផ្គង់ដែលអាចប្រើដើម្បីសង្គ្រោះជីវិតបន្ទាប់ពីការវាយប្រហារបែបនេះ។
នកនាំពាក្យសេតវិមានលោកស្រី Jen Psaki បានបញ្ជាក់ពីកិច្ចខិតខំប្រឹងប្រែងជួយ ដោយមិនបានផ្តល់ព័ត៌មានលម្អិតអំពីឧបករណ៍ដែលត្រូវបានបញ្ជូនទៅក្រុងគៀវនោះទេ។ លោកស្រីបានបន្ថែមថា ការផ្តល់ឧបករណ៍ដល់អ៊ុយក្រែនគឺសម្រាប់ត្រៀមខ្លួនប្រសិនបើមានការវាយប្រហារដោយគីមី ឬជីវសាស្ត្រឡើយ។
សេចក្តីថ្លែងការណ៍នេះកើតឡើងប៉ុន្មានសប្តាហ៍បន្ទាប់ពីលោកស្រី Jen Psaki បានស្នើថាទីក្រុងមូស្គូអាចនឹងមានគម្រោងដាក់ពង្រាយអាវុធគីមី ឬជីវសាស្ត្រប្រឆាំងនឹងអ៊ុយក្រែន។ ដំបូងឡើយ លោកស្រីបានធ្វើការអះអាងនោះជាការឆ្លើយតបទៅនឹងឯកសារដែលចុះផ្សាយដោយរុស្ស៊ី ដែលបានចោទប្រកាន់ថាមន្ទីរពិសោធន៍ដែលគាំទ្រដោយសហរដ្ឋអាមេរិកនៅអ៊ុយក្រែនកំពុងបង្កើតអាវុធជីវសាស្ត្រ៕
