ក្រសួងការពារជាតិរុស្ស៊ីបាននិយាយកាលពីថ្ងៃសៅរ៍ថា កងកម្លាំងរុស្ស៊ីត្រូវបានបញ្ជាឱ្យបន្តដំណើរឆ្ពោះទៅអ៊ុយក្រែនឡើងវិញ “គ្រប់ទិសដៅ” បន្ទាប់ពីទីក្រុងគៀវបានបដិសេធមិនធ្វើកិច្ចចរចា។
អ្នកនាំពាក្យក្រសួងការពារជាតិ លោក Igor Konashenkov បាននិយាយក្នុងអំឡុងសន្និសីទខ្លីមួយកាលពីថ្ងៃសៅរ៍ថា អង្គភាពទាំងអស់ត្រូវបានបញ្ជាឱ្យបង្កើនការវាយលុកមួយស្របតាមផែនការប្រតិបត្តិការ។
ប្រព័ន្ធផ្សព្វផ្សាយក្នុងស្រុកបានរាយការណ៍ដោយដកស្រង់សម្តីអ្នកនាំពាក្យវិមានក្រឹមឡាំង លោក Dmitry Peskov ថាប្រធានាធិបតីរុស្ស៊ី លោក វ្លាឌីមៀ ពូទីន កាលពីថ្ងៃសុក្រ បានបញ្ជាឱ្យបញ្ឈប់ប្រតិបត្តិការយោធា ក្រោមការរំពឹងទុកនៃការចរចារជាមួយថ្នាក់ដឹកនាំអ៊ុយក្រែន។
ភាគីអ៊ុយក្រែនបាននិយាយថា ក្រុងគៀវបានបដិសេធមិនចរចាជាមួយរុស្ស៊ី ដោយសារលក្ខខណ្ឌដែលបានស្នើឡើងគឺ “មិនអាចទទួលយកបាន” និងជា “ការប៉ុនប៉ងបង្ខំឱ្យប្រទេសនេះចុះចាញ់”។
យោងតាមប្រភពខាងលើបាននិយាយថា ប្រទេសរុស្ស៊ីគ្រោងនឹងឡោមព័ទ្ធ និងរារាំងទីក្រុងគៀវ ដើម្បី “គ្មានយោធា” អ៊ុយក្រែន និងបង្ខំឱ្យថ្នាក់ដឹកនាំអ៊ុយក្រែនផ្លាស់ប្តូរផ្លូវនយោបាយរបស់ខ្លួន៕
ប្រភព៖ Xinhua
