ភ្នំពេញ៖ ប្រធានក្លិបបាល់ទាត់ វិសាខា លោកជំទាវ កែ សួនសុភី បានចូលរួមឧបត្ថម្ភថវិកាចំនួន ១០ លានរៀល ដើម្បីចូលរួមប្រយុទ្ធប្រឆាំងនឹងជំងឺកូវីដ ១៩ នឹងទប់ស្កាត់ការរីករាលដាលដល់ប្រជាពលរដ្ន នាខេត្តព្រៃវែង។
នៅថ្ងៃទី២៥ ខែមីនា ឆ្នាំ២០២០ លោក លី ឡាយ ប្រធានគ្រប់គ្រងក្រុមអ្នកគាំទ្រ អ្នកចម្បាំងពណ៌ខៀវ -The Blue Warriors បាននាំយកថវិកាសប្បុរសធម៌ដ៏ថ្លៃថ្លារបស់លោកជំទាវ កែ សួនសុភី ប្រធានក្លិបកីឡាបាល់ទាត់វិសាខា ចំនួន ១០,០០០,០០០រៀល ឧបត្ថម្ភដល់រដ្ឋបាលខេត្តព្រៃវែង ដើម្បីចូលរួមបង្ការ ទប់ស្កាត់ និងប្រយុទ្ធប្រឆាំងជាមួយជំងឺផ្លូវដង្ហើមប្រភេទថ្មី Covid-19។ គិតត្រឹមពេលនេះមានមនុស្សចំនួន ៩១ នាក់ហើយដែលបានឆ្លងជំងឺថ្មីកូវីដ ១៩ ក្នុងប្រទេសកម្ពុជា ស្របពេលដែលមនុស្ស ៦ នាក់បានជាសះស្បើយ។
សូមបញ្ជាក់ថា នេះជាការចូលរួមចំណែកបន្ថែមទៀតបន្ទាប់ប្រធានក្លឹបបាល់ទាត់ភ្នំពេញក្រោន ក៏បានឧបត្ថម្ភចំនួន ៨០លានរៀល នាខេត្តព្រះសីហនុ ផងដែរ ខណៈនេះជាខេត្តទី២ ដែលទទួលបានជំនួយពីក្លិបបាល់ទាត់នៃលីគកំពូលកម្ពុជា៕
អត្ថបទ៖ មៃ ចាន់បុត្រ
