កីឡាករវ័យ ២៣ឆ្នាំបានទទួលរងនូវបញ្ហារបួសកំឡុងពេលក្រុមកាំភ្លើងធំ Arsenal បានយកឈ្នះ ៥-១ លើក្រុម Crystal Palace កាលពីថ្ងៃទី២១ ខែធ្នូ។ គាត់បានចាកចេញពីការប្រកួតក្នុងតង់ទីមួយ ហើយត្រូវបានគេប្រទះឃើញចាកចេញពីកីឡដ្ឋានដោយប្រើប្រាស់ឈើច្រត់។ ការអវត្តមានរបស់កីឡាករ Saka គឺជាការប៉ះទង្គិចយ៉ាងសំខាន់សម្រាប់ Arsenal ខណៈដែលកីឡាករសញ្ជាតិអង់គ្លេសរូបនេះបានស៊ុតបញ្ចូលទីបាន ៩គ្រាប់ និងបញ្ជូនបាល់អោយមិត្តរួមក្រុមបញ្ចប់ទី ១៣ដងក្នុងការបង្ហាញខ្លួន ២៤ប្រកួតនៅគ្រប់ការប្រកួតទាំងអស់ ដែលធ្វើអោយគាត់ក្លាយជាកម្លាំងស្នូលដ៏សំខាន់សម្រាប់តំបន់ប្រយុទ្ធរបស់ក្រុម។
ថ្លែងបន្ទាប់ពីការឈ្នះ ១-០ របស់ក្រុម Arsenal ទៅលើក្រុម Ipswich Town កាលពីយប់ថ្ងៃសុក្រ លោក Arteta បានផ្តល់ភាពច្បាស់លាស់អំពីស្ថានភាពរបស់កីឡាករ Saka ។
លោក Arteta បាននិយាយថា៖ «គាត់បានធ្វើការវះកាត់។ អ្វីៗដំណើរការល្អ ប៉ុន្តែជាអកុសលគាត់នឹងត្រូវអវត្តមានជាច្រើនសប្តាហ៍។ ខ្ញុំនិយាយច្រើនសប្តាហ៍ ដូច្នេះខ្ញុំគិតថាវានឹងលើសពីពីរខែ។ ខ្ញុំមិនដឹងច្បាស់ថារយៈពេលប៉ុន្មានទេ។ វាអាស្រ័យលើស្លាកស្នាម។ ជាលិកាចាប់ផ្តើមជាសះស្បើយនៅសប្តាហ៍ដំបូងឬយ៉ាងនេះ ការចល័តរបស់វាជាការពិបាកក្នុងការនិយាយ»។
ទោះបីជាកីឡាករ Saka អវត្តមានយូរក៏ដោយ ក្រុម Arsenal បានទទួលព័ត៌មានវិជ្ជមានមួយចំនួនទាក់ទងនឹងកីឡាករ Raheem Sterling ។ កីឡាករដែលខ្ចីជើងមកពីក្រុម Chelsea ត្រូវបានខកខានពេលវេលាដ៏សំខាន់ដោយសារតែរបួសជង្គង់ អាចនឹងត្រលប់មកលេងបានលឿនជាងការរំពឹងទុក។
លោក Arteta បានបន្ថែមថា៖ «បាទ យើងត្រូវមើលសប្តាហ៍នេះពីរបៀបដែលគាត់វិវត្តន៍។ យើងប្រហែលជារំពឹងថារបួសជង្គង់នឹងចំណាយពេលយូរជាងការវិវឌ្ឍក្នុងរយៈពេលប៉ុន្មានថ្ងៃចុងក្រោយនេះ។ សង្ឃឹមថា នោះជាដំណឹងល្អ ព្រោះយើងត្រូវការគាត់»។
ក្តីបារម្ភអំពីរបួសបច្ចុប្បន្នរបស់ក្រុម Arsenal ឈានដល់ដំណាក់កាលសំខាន់នៃរដូវកាលនេះ ដោយក្រុមនេះព្យាយាមបិទគម្លាត ៦ពិន្ទុតាមពីក្រោយក្រុមកំពូលតារាង Liverpool ។ ការទទួលជ័យជម្នះលើក្រុម Ipswich បានបង្ហាញពីភាពធន់របស់ក្រុមកាំភ្លើងធំ ប៉ុន្តែផ្លូវនៅខាងមុខនៅតែមានការលំបាក។ ការប្រកួតបន្ទាប់របស់ពួកគេគឺជាការប៉ះគ្នាក្នុងថ្ងៃចូលឆ្នាំដ៏ស្វិតស្វាញជាមួយ Brentford ដែលក្រុមរបស់ Arteta នឹងមានគោលបំណងរក្សាសន្ទុះក្នុងការប្រជែងដណ្តើមពានទោះបី Saka អវត្តមានក៏ដោយ៕
