អ្នកចាំទីសញ្ជាតិអាឡឺម៉ង់អាចនឹងខកខានការប្រកួតដែលនៅសល់ បន្ទាប់ពីគាត់ត្រូវបានបង្ខំឱ្យធ្វើការវះកាត់ ដើម្បីព្យាបាល patella របស់គាត់ដែលរហែកនៅជង្គង់។ ក្លឹប Barcelona កំពុងស្វែងរកដំណោះស្រាយបណ្ដោះអាសន្ននៅក្នុងតំណែងអ្នកចាំទី ហើយក៏បានជ្រើសរើសបេក្ខជនមួយចំនួនរួចរាល់ហើយដើម្បីពង្រឹងក្រុម។
នេះបើយោងតាមការចេញបញ្ជាក់របស់ Tomasz Wlodarczyk បានអោយដឹងថាក្លឹប Barcelona បានកំណត់គោលដៅរបស់ពួកគេលើអ្នកចាំទី Szczesny ដែលជាអ្នកចាំទីសញ្ជាតិប៉ូឡូញវ័យ ៣៤ឆ្នាំទើបតែបានចូលនិវត្តន៍កាលពីដើមរដូវក្តៅនេះ។ អ្នកចាំទីដែលលេងចុងក្រោយឱ្យក្លឹប Juventus បានទទួលយកនៅសំណើររបស់ក្លឹប Barcelona ហើយត្រៀមខ្លួនរួចជាស្រេចក្នុងការត្រលប់មកវិញ។ ទោះជាយ៉ាងណាក៏ដោយ គាត់មិនមែនជាបេក្ខភាពតែមួយគត់នៅលើរ៉ាដារបស់ពួកគេនោះទេ ព្រោះក្លឹប Barcelona ក៏ចាប់អារម្មណ៍លើអតីតកីឡាករជម្រើសជាតិកូស្តារីកា Keylor Navas ផងដែរ។
ទោះជាយ៉ាងណាក៏ដោយ យោងទៅតាម Sport បានបញ្ជាក់អំពីឧបសគ្គសំខាន់មួយដែលអាចធ្វើឱ្យមានភាពស្មុគស្មាញដល់ការផ្ទេរ។ នៅពេល Szczesny ចូលនិវត្តន៍ពី Juventus ភាគីទាំងពីរត្រូវបានគេរាយការណ៍ថាបានយល់ព្រមលើឃ្លា “សម្ងាត់” ដែលចែងថា Juventus នឹងមានសិទ្ធិទទួលបានការទូទាត់ហិរញ្ញវត្ថុ ប្រសិនបើ Szczesny សម្រេចចិត្តចុះហត្ថលេខាជាមួយក្លឹបកម្រិតកំពូលផ្សេងទៀតមុនថ្ងៃទី ២០ ខែមិថុនា ឆ្នាំ២០២៥។ លក្ខខណ្ឌនេះ ត្រូវបានរួមបញ្ចូលដោយសារតែកីឡាករ Szczesny នៅសល់កុងត្រាមួយឆ្នាំទៀតលើកុងត្រាជាមួយក្លឹប Juventus នៅពេលដែលគាត់សម្រេចចិត្តចូលនិវត្តន៍។ ប្រសិនបើការពិន័យត្រូវតែបង់ វានៅតែត្រូវមើលថាតើ Szczesny នឹងរ៉ាប់រងដោយខ្លួនឯង ឬថាតើ Barcelona ជាអ្នករ៉ាប់រងការចំណាយនេះ។
ទោះបីជាកីឡាករ Szczesny ផ្ទេរទៅក្លឹបយក្សកាតាឡានមែន ក៏ដោយគាត់ត្រូវចំណាយពេលដើម្បីស្តារភាពរឹងមាំឡើងវិញ បន្ទាប់ពីគាត់បានសម្រាក់ពីការប្រកួតអស់ជាច្រើនខែ។ រហូតដល់ពេលនោះ ពួកគេត្រូវតែពឹងផ្អែកលើ Inaki Pena ដែលគាត់អាចនឹងបង្ហាញខ្លួនសម្រាប់ការប្រកួតជាមួយ Getafe នៅថ្ងៃពុធនេះ៕
