បន្ទាប់ពីហ្វឹកហាត់ក្នុងស្រុក ក្រុមបាល់ទាត់ជម្រើសជាតិកម្ពុជាក្រោម១៦ឆ្នាំ (U16) បានធ្វើដំណើរទៅកាន់ប្រទេសឥណ្ឌូណេស៊ី ដើម្បីចូលរួមការប្រកួតជើងឯកអាស៊ាន (ASEAN U16 Boys’ Championship 2024) ដែលគ្រោងធ្វើឡើងពីថ្ងៃទី២១ ខែមិថុនា ដល់ថ្ងៃទី០៤ ខែកក្កដា ឆ្នាំ២០២៤។
គ្រូបង្គោលជម្រើសជាតិ U16 កម្ពុជា លោក Koji Gyotoku បានបញ្ជាក់មុនពេលចេញដំណើរថា ការប្រមូលផ្តុំហ្វឹកហាត់ ក្រុមយើងធ្វើមិនបានពេញលេញនោះទេ តែលោករំពឹងថាកូនក្រុមទាំងអស់នឹងប្រឹងប្រែងឱ្យអស់ពីសមត្ថភាព នៅគ្រប់ការប្រកួតទាំងអស់។ ចំពោះការលេងក៏មិនសូវបានយល់ចិត្តគ្នាប៉ុន្មានដែរ ដោយសារតែការប្រមូលផ្តុំមានរយៈពេលខ្លីពេក ហើយកីឡាករមួយចំនួនមានការប្រកួតលីគយុវជនរបស់ពួកគាត់ ហើយកម្មវិធីប្រមូលផ្តុំហ្វឹកហាត់ក៏មិនបានពេញលេញដែរ។
គ្រូបង្គោលជនជាតិជប៉ុនរូបនេះបន្ថែមថា តាមរយៈការចូលរួមប្រកួតក្នុងជើងឯកអាស៊ាននេះនឹងផ្តល់ឱ្យយើងបានស្គាល់ថាតើ ក្រុមយុវជនកម្ពុជាស្ថិតនៅកម្រិតណា ហើយក្រុមប្រទេសផ្សេងៗទៀត ក្នុងអាស៊ាន ស្ថិតនៅកម្រិតណា ដែលយើងត្រូវតែបន្តការអភិវឌ្ឍបន្ថែម។
ការប្រកួតកីឡាបាល់ទាត់ជើងឯកអាស៊ាន U16 នៅឥណ្ឌូណេស៊ីនេះ មាន១២ក្រុមចូលរួមប្រជែងជើងឯក ដោយចែកជា៣ពូល ក្នុងនោះU16កម្ពុជា ស្ថិតនៅក្នុងពូល B ជាមួយក្រុមវៀតណាម មីយ៉ាន់ម៉ា និងប្រ៊ុយណេ។ ចំពោះពូល A រួមមាន៖ ក្រុមម្ចាស់ផ្ទះ ឥណ្ឌូណេស៊ី ឡាវ ហ្វីលីពីន និងសិង្ហបុរី ខណៈពូល C រួមមាន៖ ក្រុមថៃ ម៉ាឡេស៊ី ទីម័រខាងកើត និងអូស្ត្រាលី។
ចំពោះ៣ប្រកួតប្រចាំពូល B របស់ក្រុមU16កម្ពុជាត្រូវប្រកួតបើកឆាកជាមួយក្រុមU16មីយ៉ាន់ម៉ា ថ្ងៃទី២២ ខែមិថុនា ឆ្នាំ២០២៤, កម្ពុជាបន្តប៉ះក្រុមវៀតណាម នាថ្ងៃទី២៥មិថុនា និងចុងក្រោយប៉ះជាមួយក្រុមប្រ៊ុយណេ នាថ្ងៃទី២៨ ខែមិថុនា ឆ្នាំ២០២៤។
គួរបញ្ជាក់ថា ក្រុមយុវជនក្រោម១៦ឆ្នាំកម្ពុជាបានចេញដំណើរកាលពីរសៀលថ្ងៃទី១៩ ខែមិថុនា ឆ្នាំ២០២៤ ដោយជូនដំណើរ លើកទឹកចិត្តពីឯកឧត្តម ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា (FFC) និងជាប្រធានសហព័ន្ធកីឡាបាល់ទាត់អាស៊ាន និងលោកស្រី ពុធ ធីតា អនុប្រធាន FFC៕
