អតីតខ្សែបម្រើ Chelsea និង Liverpool លោក Joe Cole បានអះអាងថា Conor Bradley មានសក្ដានុពលដើម្បីក្លាយជាកីឡាករលំដាប់ថ្នាក់ពិភពលោក បន្ទាប់ពីក្រុមហង្សក្រហមទទួលជ័យជម្នះ 6-1 លើក្រុម Sparta Prague កាលពីពេលថ្មីៗនេះ។
ថ្លែងទៅកាន់ TNT Sports លោក Cole បាននិយាយថា កីឡាករជម្រើសជាតិអៀរឡង់ខាងជើង អាចក្លាយជាកីឡាករល្អដូចអនុប្រធានក្រុមហង្សក្រហម Trent Alexander-Arnold។ គាត់បានលើកឡើងថា៖ «វាជារឿងដ៏អស្ចារ្យមួយ ដែលមានកីឡាករដ៏អស្ចារ្យពីរនាក់។ Trent ច្បាស់ណាស់ជាកីឡាករលំដាប់ពិភពលោក ហើយ Conor Bradley គឺជាកីឡាករជំនាន់ក្រោយដែលល្អ»។
គួររំលឹកដែរថា ខ្សែការពារស្លាបស្តាំរូបនេះមានល្បឿនលឿន ការបញ្ជូនបាល់ល្អ ហើយ Bradley បានខ្ចីជើងទៅក្លឹប Bolton Wanderers កាលពីរដូវកាលមុន។ គាត់បានស៊ុតបាល់បញ្ចូលទីចំនួន 7 គ្រាប់ និង assists ចំនួន 6 ដងក្នុង 53 ប្រកួត ដោយបានជួយឱ្យពួកគេរក្ស Clean Sheet បាន 25 ដង៕
