ក្លឹប Chelsea ត្រៀមនឹងលក់កីឡាករមួយចំនួនចេញពីក្លឹបក្នុងខែមករា រួមទាំង Noni Madueke ដែលទើបមកដល់បានត្រឹមតែមួយឆ្នាំ។
ក្រុមតោខៀវបានចំណាយប្រាក់អស់ចំនួន 450 លានផោនក្នុងអំឡុងពេលទីផ្សារដោះដូរកីឡាកររដូវក្តៅលើកីឡាករថ្មីចំនួន 13 នាក់ ប៉ុន្តែលោក Mauricio Pochettino បានលើកឡើងថា ក្លឹបប្រហែលជាត្រូវដោះដូរម្ដងទៀតនៅក្នុងខែមករា។
យោងតាមសារព័ត៌មាន ESPN បានរាយការណ៍ថា Madueke អាយុ 21 ឆ្នាំជាកីឡាករម្នាក់ដែលអាចត្រូវចាកចេញ។ កីឡាករជម្រើសជាតិអង់គ្លេសអាយុក្រោម 21 ឆ្នាំត្រូវបានចុះហត្ថលេខាពី PSV Eindhoven កាលពីខែមករាឆ្នាំមុន ដែលជាការចុះហត្ថលេខាដោយលោក Graham Potter ។
ខ្សែបម្រើស្លាបរូបនេះ ក៏បានជួបការលំបាកក្នុងការប្រកួត ក្រោមការដឹកនាំរបស់ Pochettino ដោយចាប់ផ្ដើមបានតែមួយប្រកួតក្នុងរដូវកាលនេះ។
ចំណែកកីឡាករ Trevoh Chalobah ត្រូវបានគេរំពឹងថានឹងចាកចេញ។ Bayern Munich និង Roma សុទ្ធតែបានចាប់អារម្មណ៍លើកីឡាករវ័យ 24 ឆ្នាំរូបនេះ ហើយ Crystal Palace ក៏កំពុងតាមដានស្ថានភាពរបស់គាត់ផងដែរ។
ហើយកីឡាករ Ian Maatsen គឺជាកីឡាករម្នាក់ទៀត ដែលអាចនឹងមានការផ្លាស់ប្តូរ ដោយកីឡាករសញ្ជាតិហូឡង់បានបង្ហាញខ្លួនត្រឹមតែ130 នាទីនៃការប្រកួតក្របខ័ណ្ឌ Premier League ក្នុង 9 ប្រកួតសម្រាប់រដូវកាលនេះ។
គួរបញ្ជាក់ផងដែរថាក្លឹប Borussia Dortmund ចាប់អារម្មណ៍ក្នុងការនាំយក Maasten ទៅកាន់ Wesfalenstadion ប៉ុន្តែវានៅតែត្រូវមើលថា តើពួកគេអាចផ្ដល់សំណើរជាអចិន្ត្រៃយ៍ដែរឬទេ៕
