សហភាពសហព័ន្ធបាល់ទាត់អឺរ៉ុបដែលហៅកាត់ថា UEFA កំពុងរៀបចំផែនការ ដែលអោយក្រុមច្រើន មានម្ចាស់ក្លឹបជាមួយគ្នា មានសិទ្ធចូលរួមប្រកួតពានរង្វាន់អឺរ៉ុប នេះបើតាមការចេញផ្សាយរបស់ 90min ។
បញ្ហានេះបានកើតឡើងវិញបន្ទាប់ពីការទិញភាគហ៊ុន 25% របស់លោក Jim Ratcliffe ក្នុងក្រុម Manchester United តាមរយៈក្រុមហ៊ុនរបស់គាត់គឺ INEOS ដែលជាម្ចាស់ក្លឹប OGC Nice ។
ដោយសារ Nice មានមួយពិន្ទុតាមពីក្រោយក្រុមកំពូលតារាង Ligue 1 PSG ហើយកំពុងស្ថិតក្នុងដំណើរឆ្ពោះទៅរកការប្រកួត Champions League ប៉ុន្តែកំពុងស្ថិតក្នុងការព្រួយបារម្ភជុំវិញបទប្បញ្ញត្តិដែលចែងថា គ្មានក្លឹបណាមួយក្នុងការប្រកួត UEFA អាចមានអំណាចនៅក្នុងការគ្រប់គ្រង ឬទិញភាគហ៊ុនរបស់ក្លឹបផ្សេងទៀតដែលមានក្នុងការប្រកួត UEFA ។
UEFA ធ្លាប់បានស៊ើបអង្កេតទំនាក់ទំនងរវាង RB Leipzig និង Red Bull Salzburg ក្នុងឆ្នាំ 2017 នៅពេលដែលក្លឹបទាំងពីរត្រូវប្រកួតក្នុង Champions League។ យ៉ាងណាមិញ ទីបំផុតសហភាពសហព័ន្ធបាល់ទាត់អឺរ៉ុប បានសម្រេចថា ក្លឹបទាំងពីរមានសិទ្ធក្នុងការចូលរួមប្រកួត ហើយពួកគេថែមទាំងបានជួបគ្នាក្នុងវគ្គចែកពូល Europa League 2018/19។
របាយការណ៍ដដែលបានបញ្ជាក់ថា INEOS មិនមានបំណងបោះបង់ Nice ហើយមិនខ្វល់ខ្វាយអំពីបញ្ហាដែលអាចកើតមានជាមួយ UEFA នៅពេលដែលទិញបានភាគហ៊ុន Manchester United ជាផ្លូវការ។ INEOS បានទាក់ទងជាមួយមន្ត្រី UEFA រួចហើយ ហើយមានការធានាថា នឹងមិនមានបញ្ហាធំណាមួយកើតឡើងទៀតទេ៕
