តារាឆ្នើមរបស់ក្លឹប Bayern Munich កីឡាករ Jamal Musiala ធ្លាប់និយាយរួចហើយថា Premier League ជាលីកខ្លាំង និងទាក់ទាញបំផុតក្នុងពិភពលោក ខណៈពេលមានការចាប់អារម្មណ៍ពីក្លឹប Liverpool ។
ហង្សក្រហមកំពុងពិចារណាលើការផ្លាស់ប្តូរដ៏គួរឱ្យចាប់អារម្មណ៍មួយលើ Musiala ដោយលោក Jurgen Klopp បានកោតសរសើរយ៉ាងខ្លាំងចំពោះអតីតតារាវ័យក្មេងរបស់ Chelsea ។ ទោះជាយ៉ាងណាក៏ដោយ កីឡាករជម្រើសជាតិអាឡឺម៉ង់នឹងមិនចាកចេញពីក្លឹប Bayern Munich ក្នុងពេលឆាប់ៗនេះទេ ដោយមានកិច្ចសន្យាជាមួយក្លឹបជើងឯកអាល្លឺម៉ង់រហូតដល់ឆ្នាំ 2026។
Musiala បានដើរតួយ៉ាងសំខាន់ក្នុងភាពជោគជ័យរបស់ Bayern ក្នុងប៉ុន្មានឆ្នាំថ្មីៗនេះ ដោយស៊ុតបញ្ចូលទីបាន 16 គ្រាប់ និង Assists ចំនួន 16 ដងក្នុងការប្រកួតទាំងអស់កាលពីរដូវកាលមុន។ ដូចដែលបានរាយការណ៍ដោយ Bild ថាកិច្ចពិភាក្សាបន្តកិច្ចសន្យារបស់គាត់ជាមួយក្លឹបគ្រោងនឹងធ្វើឡើងនៅឆ្នាំក្រោយ ហើយ Musiala ហាក់មានអារម្មណ៍សប្បាយចិត្តជាមួយក្លឹប Bayern។
ចំណែកឯ Manchester City និង Real Madrid ក៏ត្រូវបានគេនិយាយថា កំពុងតាមដានស្ថានភាពរបស់ Musiala ទោះបីជាដឹងថាគាត់អាចបន្តកិច្ចព្រមព្រៀងនាពេលខាងមុខក៏ដោយ។ យ៉ាងណាក៏ដោយ Bayern នៅតែមានការព្រួយបារម្ភថា កីឡាករវ័យក្មេងរូបនេះអាចចាកចេញ។
ថ្មីៗនេះ Musiala បានប្រាប់ Bild នៅពេលនិយាយអំពីលទ្ធភាពនៃការផ្លាស់ប្តូរទៅកាន់ប្រទេសអង់គ្លេសថា៖ «Premier League គឺជាលីកដែលខ្លាំង និងទាក់ទាញបំផុតក្នុងពិភពលោកនៅពេលនេះ ប៉ុន្តែខ្ញុំមានអារម្មណ៍ល្អនៅទីនេះ ហើយខ្ញុំផ្តោតលើការទទួលបានជោគជ័យជាមួយ Bayern ។ ប៉ុន្តែអ្នកមិនដឹងថា នឹងមានអ្វីកើតឡើងនៅពេលខាងមុខទេ»។
គួរបញ្ជាក់ផងដែរ Musiala បានឈ្នះពានរង្វាន់ចំនួន 10 ជាមួយ Bayern រួមទាំង Champions League ផងដែរ វាអាចនិយាយបានថា វាគ្រប់គ្រាន់សម្រាប់គាត់ជាមួយក្លឹបយក្សអាល្លឺម៉ង់ Bayern៕
