ក្លឹប Manchester United និង Newcastle បានត្រៀមប្រជែងយកខ្សែបម្រើ Adrien Rabiot របស់ Juventus នៅខែមករា។
បិសាចក្រហម គឺជាក្លឹបដែលពេញចិត្តកីឡាករសញ្ជាតិបារាំង ហើយត្រូវបានផ្សារភ្ជាប់យ៉ាងខ្លាំងជាមួយនឹងការផ្លាស់ទៅ Old Trafford កាលពីរដូវក្តៅមុន។ លោក Erik ten Hag ត្រូវបានគេនិយាយថា នឹងព្យាយាមម្ដងទៀត ដើម្បីចុះហត្ថលេខាលើកីឡាករវ័យ 28 ឆ្នាំក្នុងខែមករា មុនពេលគាត់ចុះហត្ថលេខាបន្តរយៈពេលមួយឆ្នាំទៀតនៅ Juventus ។
Man United ឥឡូវនេះកំពុងសម្លឹងមើលកិច្ចព្រមព្រៀងខែមករា ប៉ុន្តែនឹងត្រូវប្រឈមមុខនឹងការប្រកួតប្រជែងដ៏តឹងតែងពីគូប្រជែង Premier League គឺក្រុម Newcastle នេះបើយោងតាមការចុះផ្សាយរបស់ Calciomercato របស់អ៊ីតាលី។
ក្រុម Newcastle មានបំណងចង់បន្ថែមកីឡាករដែលមានបទពិសោធន៍នៅអឺរ៉ុបមួយចំនួនទៅក្នុងក្រុមរបស់ពួកគេ ហើយជឿជាក់ថាកីឡាករសញ្ជាតិបារាំងរូបនេះ នឹងក្លាយជាការបន្ថែមដ៏សំខាននៅក្នុងការប្រជែង Champions League របស់ពួកគេ។
កីឡាករ Rabiot បានចូលរួមជាមួយ Juventus ពី Paris Saint-Germain ក្នុងឆ្នាំ 2019 ហើយបានបង្ហាញខ្លួន 182 លើក ហើយបានឈ្នះពាន Serie A ក្នុងរដូវកាលដំបូង។
គាត់បានក្លាយជាកីឡាករសំខាន់ក្នុងក្រុមក្រោមការដឹកនាំរបស់ Massimiliano Allegri កាលពីរដូវកាលមុន ដោយស៊ុតបញ្ចូលទីបាន 8 គ្រាប់ និងបញ្ជូនបាល់ឱ្យមិត្តរួមក្រុមចំនួន 4 ដងនៅក្នុងលីក៕
