លោក Mikel Arteta គ្រូបង្វឹកក្រុមកាំភ្លើងធំ Arsenal បានបង្ហើបថា Gabriel Martinelli បានរងរបួសសរសៃពួរ ក្នុងការប្រកួតជាមួយក្រុម Everton ។
ខ្សែប្រយុទ្ធសញ្ជាតិប្រេស៊ីលរូបនេះបានបង្ហាញខ្លួនត្រឹមតែ 24 នាទីនៅក្នុងការប្រកួតហើយត្រូវបានប្ដូរចេញពីទីលាន។ Martinelli ត្រូវបានជំនួសដោយ Leandro Trossard ដោយកីឡាករបែលហ្ស៊ិករូបនេះ រកគ្រាប់បាល់បានមួយគ្រាប់សម្រាប់ក្រុមកាំភ្លើងធំ។
លោក Mikel Arteta បានប្រាប់ Sky Sports នៅពេលត្រូវបានគេសួរអំពីស្ថានភាពរបស់ Martinelli ថា៖ «គាត់មានអារម្មណ៍ថា គាត់មានបញ្ហាសរសៃពួរ ដូច្នេះគាត់កំពុងរងចាំការពិនិត្យ និងវាយតម្លៃ »។
គាត់បានបន្ថែមទៅកាន់ BBC Sport ថា៖ «យើងត្រូវបន្តស្វែងរកកីឡាករដើម្បីជំនួសគាត់ ។ គាត់ពិតជាសំខាន់សម្រាប់ក្រុមទាំងមូល យើងមិនដឹងទេថាស្ថានភាពរបួសគាត់បែបណា»។
គួបញ្ជាក់ផងដែរ Arsenal នៅតែមិនស្គាល់ចាញ់សោះតាមរយៈការប្រកួត Premier League ចំនួន 5 ដងក្នុងរដូវកាល 2023-24 ដោយក្រុមជើងឯករងរដូវកាលមុនទទួលបាន 13 ពិន្ទុ ដែលអាចឈរនៅលេខ 4 ក្នុងតារាង៕
