ពោធិ៍សាត់៖ ស្លាប់ម្នាក់ របួសធ្ងន់ម្នាក់ ដោយករណីគ្រោះថ្នាក់ចរាចរណ៍ជិះម៉ូតូបុកម៉ូតូបត់ឆ្លងផ្លូវ នៅលេីផ្លូវក្រាលកៅស៊ូ ចំណុចមុខផ្ទះឈ្មោះ ទុំ ភីន ស្ថិតនៅភូមិដំណាក់ធ្នង់ ឃុំខ្នារទទឹង ស្រុកបាកាន កាលពីថ្ងៃអាទិត្យ៣កេីត ខែភទ្របទ ឆ្នាំថោះ ព.ស២៥៦៧ ត្រូវនឹងថ្ងៃទី១៧ ខែកញ្ញាឆ្នាំ២០២៣ វេលាម៉ោង១២និង៤៥នាទី បង្កឲ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចចុះទៅដល់កន្លែងកើតហេតុ។
តាមប្រភពព័ត៌មាននៅកន្លែងកើតហេតុបានឲ្យដឹងថាមុនពេលកើតហេតុ គេឃើញមានម៉ូតូ០១ គ្រឿងម៉ាកវ៉េវ ពណ៌ទឹកសណ្តែកស៊េរីឆ្នាំ២០១៩ គ្មានស្លាកលេខ បើកបរដោយឈ្មោះ ថា ពុទ្ធី ភេទប្រុស អាយុ២៩ឆ្នាំ រស់នៅភូមិកំប្រាក់កូន ឃុំខ្នារទទឹង មិនពាក់មួកសុវត្ថិភាព(រងរបួសធ្ងន់)ធ្វើដំណើរពីត្បូងទៅជើង លុះមកដល់ចំណុចកេីតហេតុខាងលើបានបុកយ៉ាងពេញទំហឹងជាមួយម៉ូតូម៉ាក់វេវ ពណ៌ខ្មៅ ស៊េរីឆ្នាំ២០២២ ពាក់ស្លាកលេខពោធិ៍សាត់1N-8030 បើកបរដោយឈ្មោះ ទុំ ភីន ភេទស្រីអាយុ៥៨ឆ្នាំ មានទីលំនៅភូមិដំណាក់ធ្នង់ ឃុំខ្នារទទឹង ស្រុកបាកាន មិនពាក់មួកសុវត្ថិភាព ជិះបត់ឆ្លងផ្លូវពីកើតទៅត្បូងបណ្តាលឲ្យស្លាប់នៅនឹងកន្លែងកើតហេតុ និងអ្នករួមដំណើរឈ្មោះ ជាតិ ជេម ភេទប្រុសអាយុ០៥ឆ្នាំ រស់នៅភូមិឃុំជាមួយគ្នា(គ្មានរបួស)ចំពោះអ្នករងរបួសធ្ងន់ត្រូវបានក្រុមគ្រូពេទ្យបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកស្រុកបាកាន។
លោកវរសេនីយ៍ឯក នាង វុធ អធិការនគរបាលស្រុកបាកាន បានឲ្យដឹងថា បន្ទាប់ពីកម្លាំងនគរបាលជំនាញចរាចរណ៍បានចុះទៅពិនិត្យនិងធ្វើការវាស់វែងរួចហើយ បានសន្និដ្ឋានថាករណីគ្រោះថ្នាក់ចរាចរណ៍នេះបណ្ដាលមកពីកត្តាអ្នកបើកបរម៉ូតូបត់ឆ្លងផ្លូវខ្វះការប្រុងប្រយ័ត្ន។រីឯសពសមត្ថកិច្ចបានធ្វើកំណត់ហេតុប្រគល់ជូនក្រុមគ្រួសារធ្វើបុណ្យតាមប្រពៃណី។
ចំពោះវត្ថុតាងម៉ូតូចំនួន០២គ្រឿង បានយកមករក្សាទុកនៅប៉ុស្តិ៍នគរបាលរដ្ឋបាលខ្នារទទឹង រង់ចាំការដោះស្រាយតាមនីតិវិធី៕
ប្រភព៖ អគ្គស្នងការដ្ឋាននគរបាលជាតិ
