Manuel Neuer អតីតប្រធានក្រុម នៅតែមិនអាចចូលរួមប្រកួត ដោយសារគាត់មិនទាន់មានកម្លាំងគ្រប់គ្រាន់ក្នុងការប្រកួត ១០០ភាគរយ បន្ទាប់ពីគាត់មានរបួសកំឡុងពេលជិះស្គីកាលពីខែមករា។ ខណៈពេលដែលអ្នកចាំទីមិនទាន់ចូលនិវត្តន៍ជាផ្លូវការពីបាល់ទាត់អន្តរជាតិ អ្នកចាត់ការ Hansi Flick បានជ្រើសរើសខ្សែបម្រើជើងចាស់ Gundogan ជាប្រធានក្រុម ។
កីឡាកររូបនេះបានបង្ហោះលើបណ្ដាញសង្គម ដើម្បីចែករំលែកក្ដីរំភើបចិត្តរបស់ខ្លួន ដោយបានសរសេរថា៖ «ជាកិត្តិយសដ៏ធំ ក្នុងការក្លាយជាប្រធានក្រុមថ្មី របស់ក្រុមជម្រើសជាតិអាល្លឺម៉ង់»។
Flick បានប្រកាសថា Gundogan ជាប្រធានក្រុមហើយកីឡាករ Joshua Kimmich ជាអនុប្រធានក្រុម ។
គាត់បានប្រាប់អ្នកកាសែតមុនពេលប៉ះជប៉ុន ក្នុងការប្រកួតមិត្តភាពថា៖ «យើងមានការផ្លាស់ប្តូរ។ យើងបានគិតអំពីវា តើអ្នកណាអាចជួយក្រុមបានច្រើន ហើយសាកសមសម្រាប់តំណែងមួយនេះ»។
«ជាមួយក្រុមជម្រើសជាតិ អ្នកណាដែលមានការប្រកួតអន្តរជាតិច្រើនជាងគេអ្នកនោះគឺជាប្រធាន ។ ខ្ញុំបានសម្រេចចិត្តផ្តល់ឱ្យ Ilkay ពាក់ផ្លាកប្រធានក្រុម។ រួមគ្នាជាមួយ Joshua Kimmich ឥឡូវនេះក្លាយជាអ្នកដឹកនាំរបស់យើង។ ខ្ញុំពិតជាសប្បាយចិត្តដែលអ្នកទាំងពីរ បានប្តេជ្ញាចិត្តធ្វើវា។ វាផ្តល់ឱ្យយើងនូវថាមពលថ្មី»៕
