បរទេស៖ ខ្សែប្រយុទ្ធវ័យ ៣០ឆ្នាំ ដែលមិនទាន់ស្គាល់ជាតិពានលីគបាល់ទាត់ នៅក្នុងអាជីពរបស់ខ្លួនសោះ បើទោះបីជាគាត់ស៊ុតបញ្ចូលទីបានច្រើនអោយក្លឹប Spurs ក៏ដោយ។ ក្លឹប Bayern Munich បានព្យាយាម ក្នុងការចុះហត្ថលេខាយករូបគាត់ជាច្រើនដងមកហើយ ស្របពេលដែលកុងត្រារបស់ Kane នឹងត្រូវផុតនៅរដូវក្តៅក្រោយ។ លោក Daniel Levy អាចនឹងលក់គាត់ ដើម្បីទទួលបានប្រាក់ត្រលប់មកវិញខ្លះនៅក្នុងទីផ្សារដោះដូរនារដូវក្តៅនេះ ដោយជៀសវាងនៅការបាត់បង់រូបគាត់ដោយមិនបានអ្វីសោះ។ ហើយវាក៏ជាអ្វីដែលលោក Gary Linker ធ្លាប់និយាយថានឹងអាចកើតឡើងផងដែរ។
ក្នុងនោះលោក Gary Linker ដែលជាពិធីករ ក៏ដូចជាអតីតកីឡាករបាល់ទាត់ម្នាក់ផងនោះ បានប្រាប់ទៅកាន់សារព័ត៌មាន The Sun ថា “ខ្ញុំគិតថា Harry នឹងចាកចេញពី Tottenham ហើយគាត់នឹងធ្វើវា។ ខ្ញុំគិតថាគាត់ចង់ទៅ ហើយគាត់នឹងធ្វើអោយរឿងនេះកើតឡើង។ នេះជាពេលដល់សមស្របសម្រាប់គាត់ ហើយក្លឹបដែលសាកសមនឹងគាត់ក៏មករកគាត់ដូចគ្នា។ ទីក្រុង Munich គឺជាក្រុងដល់ល្អមួយ ហើយក្លឹប Bayern ក៏ជាក្លឹបមួយដែលល្អនៅក្នុងពិភពលោកផងដែរ”។
លោក Gary Linker ក៏បានបន្ថែមទៀតថា “វាមិនមែនត្រឹមតែការស៊ុតបញ្ចូលទីនោះទេ ប៉ុន្តែក៏ជាការ assists, ទម្រង់របស់គាត់ និងសមត្ថភាព ជាអ្នកដឹកនាំរបស់គាត់ផងដែរ។ ប៉ុន្តែនៅពេលដែលគាត់បានឈានដល់រដូវកាលចុងក្រោយនៃកុងត្រារបស់ខ្លួន សម្រាប់ខ្ញុំ គឺវាសាកសមណាស់ចំពោះ Spurs ដែលនឹងទទួលបានតម្លៃ ៨០លាន ឫក៏ ១០០លានផោននៅពេលនេះ ប្រសិនជាងបាត់បងគាត់ដោយមិនបានអ្វីសោះ”។
គួរបញ្ជាក់ថាក្លឹប Bayern បានដាក់សំណើរចុងក្រោយក្នុងការផ្ទេរយក Kane ក្នុងតម្លៃប្រមាណ ៨៦លានផោន និងបានជម្រុញទៅកាន់ក្លឹបដែលមានមូលហេតុនៅភាគខាងជើងទីក្រុងឡុងដ៍ អោយធ្វើការសម្រេចចិត្ត។ ទោះបីជាយ៉ាងណាក៏ដោយ ពួកគេបានបញ្ជាក់ថា នឹងត្រូវប្រកួតប្រជែងជាមួយនឹងក្លឹប PSG ដែលកំពុងស្វែងរកនៅអ្នកមកជំនួសកន្លែងរបស់កីឡាករ Kylian Mbappe នៅរដូវក្តៅនេះដូចគ្នា៕
