Joao Cancelo បានធ្វើដំណើរជាមួយក្រុម Manchester City សម្រាប់ការប្រកួតមុនបើករដូវកាលរបស់ពួកគេ បន្ទាប់ពីបានចាកចេញក្នុងលក្ខខណ្ឌខ្ចីជើងកាលពីរដូវកាលមុនទៅកាន់ក្រុម Bayern Munich ។
Cancelo បានធ្លាក់ចេញពីការពេញចិត្តនៅក្រុមមេឃខៀវកាលពីរដូវកាលមុន ហើយបានចាកចេញក្នុងលក្ខខណ្ឌខ្ចីជើងសម្រាប់ Bayern Munich នៅចុងបញ្ចប់នៃទីផ្សារដោះដូរកីឡាករខែមករា។
Man City បានឈ្នះពានរង្វាន់បីដោយគ្មាន Cancelo ដោយប្រើប្រព័ន្ធលេងដោយគ្មានខ្សែការពារស្លាប ។ បន្ទាប់ពីបានបង្ហាញខ្លួនសម្រាប់ក្រុមយក្សអាល្លឺម៉ង Bayern ក៏បានបដិសេធឱកាសក្នុងការចុះហត្ថលេខាលើ Cancelo ជាអចិន្ត្រៃយ៍ ហើយគាត់បានត្រលប់មកវិញសម្រាប់ការហ្វឹកហាត់មុនបើករដូវកាល ប៉ុន្តែនៅតែមានការសង្ស័យអំពីអនាគតរបស់គាត់។
ថ្លែងនៅមុនការប្រកួតមុនបើករដូវកាលដំបូងរបស់ Man City ជាមួយ Yokohama F Marinoa លោក Guardiola ត្រូវបានសួរអំពីអនាគតរបស់ Cancelo ហើយគាត់បានបញ្ជាក់ថា កីឡាករសញ្ជាតិព័រទុយហ្គាល់នៅតែជាផ្នែកនៃផែនការរបស់គាត់។
លោកបានបន្តនិយាយថា «គាត់នៅទីនេះ។ Joao មានសារៈសំខាន់ណាស់សម្រាប់ពួកយើងកាលពីពេលកន្លងមក។ គាត់ត្រលប់មកទីនេះវិញ ហើយជាផ្នែកមួយនៃក្រុម។ អ្នកទាំងអស់គ្នានឹងឃើញមានអ្វីប្លែកកើតឡើងនៅរដូវកាលក្រោយ»។
ហើយចម្លើយមួយទៀតលោក Guardiola បាននិយាយថា «ខ្ញុំមិនអាចឆ្លើយអំពីអនាគតរបស់កីឡាករមួយចំនួនបានទេ ព្រោះរឿងខ្លះយើងមិនអាចកំណត់បាននោះទេ»៕
