នេះបើយោងតាមការចេញផ្សាយរបស់ទំព័រហ្វេសប៊ុកផ្លូវការរបស់ FA Thailand នៅមុននេះបន្តិច បានសរសេររៀបរាប់ដូចខាងក្រោមថា៖
«សហព័ន្ធកីឡាបាល់ទាត់ថៃ (FA Thailand) មានការសោកស្ដាយជាទីបំផុត ចំពោះឧប្បត្តិហេតុដែលបានកើតឡើងក្នុងការប្រកួតចុងក្រោយនៃការប្រកួតកីឡាស៊ីហ្គេមលើកទី៣២ រវាងក្រុមបាល់ទាត់ជម្រើសជាតិថៃ និងក្រុមបាល់ទាត់ជម្រើសជាតិឥណ្ឌូនេស៊ី នៅថ្ងៃទី១៦ ខែឧសភា ឆ្នាំ២០២៣ នៅប្រទេសកម្ពុជា។
ទាក់ទងនឹងលទ្ធផលនៃការប្រកួត សហព័ន្ធជឿជាក់យ៉ាងមុតមាំថា ក្រុមជម្រើសជាតិថៃ មានសក្ដានុពលក្នុងការឈានទៅវគ្គផ្តាច់ព្រ័ត្រ តាមរយៈការរួមបញ្ចូលគ្នានៃទម្រង់លេងដែលអាចសម្របខ្លួនបាន និងផ្នត់គំនិតដ៏រឹងមាំដែលអាចត្រូវបានលើកតម្កើង និងកែលម្អ។ ទោះបីជាយ៉ាងណាក៏ដោយ ខណៈពេលដែលការទទួលបានចំណាត់ថ្នាក់លេខ 2 ប្រហែលជាមិនបានបំពេញតាមការរំពឹងទុករបស់កីឡាករ និងគ្រូបង្វឹកទាំងអស់ រួមជាមួយនឹងអ្នកគាំទ្រនោះ បាល់ទាត់គឺមានការប្រកួតប្រជែងដែលតែងតែផ្តល់លទ្ធផលដល់អ្នកឈ្នះដែលដែលបានបង្ហាញភាពខ្លាំងនៅលើទីលាន និងក្រុមចាញ់ដែលត្រូវតែប្រមូលផ្តុំ និងពង្រឹងជំនាញ និងក្រុមរបស់ពួកគេឡើងវិញនាពេលអនាគត សម្រាប់ការប្រកួតប្រជែងនាពេលខាងមុខទៀត។
យ៉ាងណាក៏ដោយ ក្រៅពីការបំពេញតួនាទីមិនបានល្អរបស់ក្រុមជម្រើសជាតិយើង សហព័ន្ធក៏សូមសម្តែងការខកចិត្ត និងសូមអភ័យទោសចំពោះឧប្បត្តិហេតុដែលបានកើតឡើងក្នុងការប្រកួតដែលបានស្តែងចេញនៅមុខទស្សនិកជនទាំងអស់ ទាំងក្នុងកីឡដ្ឋាន និងអ្នកគាំទ្រជុំវិញពិភពលោក។ វាបានបង្កការខូចខាតមុខមាត់យ៉ាងធ្ងន់ធ្ងរដល់ក្រុមបាល់ទាត់ជម្រើសជាតិថៃ។
ក្នុងន័យនេះ យើងសូមជូនដំណឹងថា គណៈកម្មាធិការវិន័យនឹងត្រូវបានបង្កើតឡើង ដើម្បីស៊ើបអង្កេតឱ្យបានហ្មត់ចត់ចំពោះបុគ្គលទាំងអស់ដែលបានដើរតួក្នុងការផ្តួចផ្តើម និងពាក់ព័ន្ធនឹងឧប្បត្តិហេតុនេះ។ គោលបំណងរបស់គណៈកម្មាធិការគឺប្រមូលអង្គហេតុឱ្យបានឆាប់រហ័ស និងចាត់វិធានការសមស្របតាមបទប្បញ្ញត្តិដែលកំណត់ដោយសហព័ន្ធ។ លើសពីនេះទៅទៀត នឹងមិនមានការការពារ ឬអភ័យឯកសិទ្ធិផ្តល់ឱ្យអ្នកបង្ករ ចំពោះការប្រព្រឹត្តខុសក្នុងឧប្បត្តិហេតុនេះឡើយ។ ជាលទ្ធផល នីតិវិធីស៊ើបអង្កេតនឹងចាប់ផ្តើមភ្លាមៗនៅពេលក្រុមនេះត្រឡប់ទៅប្រទេសថៃវិញ។
ជាចុងក្រោយ សមាគមយើងសូមចូលរួមរំលែកទុក្ខយ៉ាងក្រៀមក្រំចំពោះអ្នកគាំទ្រកីឡាបាល់ទាត់ថៃ ប្រជាពលរដ្ឋថៃ និងចូលរួមទាំងអស់គ្នា និងរងគ្រោះដោយឧបទ្ទវហេតុនេះ។ លើសពីនេះ យើងកំពុងធ្វើការសុំទោសជាផ្លូវការដល់ស្ថាប័នផ្សេងទៀតទាំងអស់ ដែលពាក់ព័ន្ធនឹងការប្រកួតប្រជែងនេះសម្រាប់ការរអាក់រអួល ឬការរំខានណាមួយដែលបង្កឡើង។ លើសពីនេះ យើងបើកទូលាយ និងទទួលយករាល់ការផ្ដល់យោបល់ដែលមានគោលបំណងពង្រឹងការអនុវត្ត និងការពារកុំឱ្យកើតមានករណីស្រដៀងគ្នានេះនៅពេលអនាគត។ យើងប្តេជ្ញាពិចារណា និងទទួលយករាល់ការផ្ដល់យោបល់ក្នុងន័យស្ថាបនា ដើម្បីកែលម្អ»៕
