គ្រូបង្វឹកអាហ្សង់ទីនលោក Antonio Mohamed បានបើកការវាយប្រហារយ៉ាងចាស់ដៃទៅលើក្លឹប Paris Saint-Germain សម្រាប់បញ្ហារបស់ Lionel Messi ។
Messi បានធ្វើឲ្យមានការភ្ញាក់ផ្អើល បន្ទាប់ពីបានធ្វើដំណើរទៅប្រទេសអារ៉ាប៊ីសាអូឌីត។ ដំណើរទៅតំបន់មជ្ឈិមបូព៌ា ដោយគ្មានការអនុញ្ញាត ប៉ុន្មានម៉ោងបន្ទាប់ពីក្រុមយក្ស Ligue 1 ចាញ់ Lorient វាមិនមែនជារឿងល្អទេសម្រាប់ក្រុម PSG។
Paris Saint-Germain បានសម្រេចចិត្តចាត់វិធានការប្រឆាំងនឹងម្ចាស់ពានរង្វាន់ Ballon d’Or ប្រាំពីរសម័យ ដោយព្យួរការប្រកួតរបស់គាត់រយៈពេលពីរសប្តាហ៍។ Messi ត្រូវបានហាមប្រាមពីការហ្វឹកហាត់ជាមួយក្រុម សម្រាប់រយៈពេលនៃការព្យួរការងារនេះ ហើយនឹងមិនត្រូវទទួលបានប្រាក់ពលកម្មក្នុងអំឡុងពេលនេះផងដែរ។
ទោះបីជាយ៉ាងណាក៏ដោយ Mohamed បានខឹងសម្បារនឹងរបៀបដែល PSG បានប្រព្រឹត្តចំពោះ Messi ក្នុងប៉ុន្មានថ្ងៃថ្មីៗនេះ ដោយលោកបាននិយាយថា៖ «វាជាការខ្វះការគោរពសម្រាប់ Lionel Messi។ មនុស្សចិត្តចង្អៀតទាំងនេះ ដែលមិនធ្លាប់ឈ្នះអ្វីទាំងអស់ នឹងមិនឈ្នះទេ បើទោះបីជាពួកគេទិញទួអេហ្វេល ហើយដាក់វានៅមុខក្លោងទ្វារក៏ដោយ។ វាគឺជាការខ្វះការគោរពទាំងស្រុង»។
គ្រូបង្វឹកក្រុមជម្រើសជាតិអាហ្សង់ទីនរូបនេះបានបន្ថែមថា៖ «អនុញ្ញាតឱ្យ Lionel Messi ជ្រើសរើសទិសដៅដែលគាត់អាចរីករាយ។ ខ្ញុំគិតថានោះជារឿងល្អបំផុតសម្រាប់គាត់ និងសម្រាប់បាល់ទាត់។ នេះជាអ្វីដែលយើងទាំងអស់គ្នាចង់បាន គឺចង់ឃើញគាត់សប្បាយចិត្តនៅលើទីលាន។ គាត់មើលទៅមិនសប្បាយចិត្តនៅ PSG ទេ»៕
