យោងតាមការចេញផ្សាយរបស់ BBC បានអោយដឹងថាក្រុម Manchester United នឹងអវត្តមានកីឡាករសំខាន់ៗជាច្រើនសម្រាប់ការប្រកួត Europa League ទល់នឹងក្រុម Sevilla នៅវគ្គ ៨ ក្រុមចុងក្រោយជើងទី ២នៅថ្ងៃព្រហស្បតិ៍នេះ។
Erik Ten Hag បាននិយាយថា Rashford បានចូលហ្វឹកហាត់ជាមួយក្រុម ប៉ុន្តែមិនទាន់អាចសម្រេចបានថា តើគាត់នឹងមានវត្តមាននៅក្នុងការប្រកួតឬអត់នោះទេ។
Lisandro Martinez ក៏ត្រូវអវត្តមានសម្រាប់រដូវកាលនេះ បន្ទាប់ពីបានបាក់ឆ្អឹងប្រអប់ជើងក្នុងជំនួបជើងទី 1 ខណៈដែរ Raphael Varane មិនបានធ្វើដំណើរទៅកាន់ភាគខាងត្បូងនៃប្រទេសអេស្ប៉ាញ ដោយសារការរងរបួសកជើងក្នុងលទ្ធផលស្មើ 2-2 នៅ Old Trafford ។ Scott McTominay ក៏រងរបួសដែរ ហើយអ្វីដែលអាក្រក់បំផុតនោះគឺអវត្តមានរបស់ Bruno Fernandes ផងដែរ។
ចំណែកគ្រូបង្វឹករបស់ក្រុម Sevilla លោក José Luis Mendilibar បាននិយាយថា៖ «ប្រសិនបើខ្ញុំត្រូវតែនិយាយដោយស្មោះត្រង់នោះ វាមិនមែនជាការប្រកួតងាយស្រួលនោះទេ។ ទោះបីជាគាត់អវត្តមានកីឡាករសំខាន់មួយចំនួនក៏ដោយ ក៏ប៉ុន្តែនៅលើទីលានយើងនៅតែប្រកួតកីឡាករ 11 នាក់ទល់នឹង 11 នាក់ ។ វានឹងក្លាយជាការប្រកួតដ៏ស្វិតស្វាញមួយ។ សម្រាប់ខ្ញុំ គិតថាលទ្ធផលគឺ 50%-50%»៕
