ក្លឹប Barcelona ត្រូវបានគេរាយការណ៍ថា បានដាក់ចេញនូវច្បាប់ថ្មីចំនួន 3 បន្ថែមទៀតនៅលើច្បាប់មុន ដើម្បីធានានូវវិន័យ និងការប្តេជ្ញាចិត្តនៅក្នុងក្លឹប។
នេះបើតាម Cadena SER បានឲ្យដឹងថាក្លឹបអ្នកមានបុណ្យ បានបន្ថែមច្បាប់ថ្មីដែលតម្រូវឲ្យកីឡាករអនុវត្តតាមក្នុងរដូវកាលនេះ ក្រោមការដឹកនាំរបស់លោក Xavi Hernandez ។
ច្បាប់ចំនួនពីរក្នុងចំនោមច្បាប់ទាំងបីដែលបានណែនាំថ្មីគឺ ហាមប្រើប្រព័ន្ធផ្សព្វផ្សាយសង្គមពេលចូលរួមក្នុងសកម្មភាពក្រុម និងហាមបង្ហោះរូបភាព ឬមតិដែលអាចឆ្លុះបញ្ចាំងមិនល្អចំពោះក្លឹប ឬនរណាម្នាក់ដែលពាក់ព័ន្ធជាមួយក្លឹប។
ទីបីគឺកីឡាករនឹងត្រូវបានកាត់ 10% នៃប្រាក់ឈ្នួលពលកម្មរបស់ពួកគេ ប្រសិនបើពួកគេបដិសេធមិនព្រមសហការសម្រាប់ការផ្សព្វផ្សាយពាណិជ្ជកម្មទាក់ទងនឹងក្លឹប ឬសកម្មភាពផ្សព្វផ្សាយ។
Xavi សង្ឃឹមថានេះនឹងនាំកីឡាករក្នុងក្រុមរបស់គាត់ខិតទៅជិតគ្នាទៅវិញទៅមក អត្ថប្រយោជន៍ដែលអាចប្រមូលបាននៅលើទីលាន។ គាត់បានណែនាំច្បាប់ចំនួន 10 នៅពេលដែលគាត់បានចូលកាន់តំណែងនៅ Nou Camp កាលពីឆ្នាំមុន ដូចដែលបានរាយការណ៍ដោយសារព័ត៌មាន AS របស់អេស្ប៉ាញ។
ដែលច្បាប់ទាំង 10 នោះរួមមានដូចខាងក្រោម៖
1. កីឡាករត្រូវតែមកដល់ 90 នាទីមុនពេលចាប់ផ្តើមការហ្វឹកហាត់
2. បុគ្គលិកត្រូវមកដល់ពីរម៉ោងមុនពេលចាប់ផ្តើមការហ្វឹកហាត់
3. កីឡាករត្រូវញ៉ាំអាហារនៅទីលានហ្វឹកហាត់របស់ក្លឹប
4. ការពិន័យត្រូវបានណែនាំឡើងវិញ
5. ការពិន័យទ្វេរដងចំពោះសកម្មភាពល្មើសដដែលៗ
6. កីឡាករត្រូវតែនៅផ្ទះមុនពាក់កណ្តាលអធ្រាត្រ ពីរថ្ងៃមុនការប្រកួត
7. កីឡាករត្រូវតែប្រឹងឲ្យអស់សមត្ថភាពក្នុងការហ្វឹកហាត់
8. សកម្មភាពក្រៅទីលានរបស់កីឡាករនឹងត្រូវបានត្រួតពិនិត្យ
9. សកម្មភាព «ដែលមានហានិភ័យ» មិនត្រូវបានអនុញ្ញាតទៀតទេ
10. ទំនាក់ទំនងល្អក្នុងក្រុមគឺចាំបាច់៕
