Raphinha បានសារភាពថាការមើលតារាឆ្នើម Ronaldinho លេងឱ្យក្រុម Barcelona ក្នុងទសវត្សរ៍ឆ្នាំ 2000 បានធ្វើឱ្យគាត់គួចចិត្តស្រលាញ់ក្រុមយក្សកាតាឡាន់មួយនេះ។
ខ្សែបម្រើស្លាបរូបនេះបានបញ្ចប់ការផ្ទេរទៅកាន់ Camp Nou កាលពីថ្ងៃសុក្រ ដោយបដិសេធសំណើររបស់ Chelsea ហើយក្រុមកាំភ្លើងធំ Arsenal ក៏ចាប់អារម្មណ៍ចង់បាន Raphinha ផងដែរ។
ថ្លែងក្នុងពិធីបង្ហាញមុខ Raphinha ក៏បានបញ្ជាក់ផងដែរថា ក្តីស្រលាញ់របស់គាត់ចំពោះ Ronaldinho ពិតជាមានឥទ្ធិពលលើកន្លែងដែលគាត់ចង់ទៅ បន្ទាប់ពីចាកចេញពីទឹកដី Elland Road។
Raphinha បាននិយាយថា៖ «ខ្ញុំចាប់ផ្តើមមើល Barça នៅពេលដែល Ronaldinho មកទីនេះ។ អ្វីគ្រប់យ៉ាងដែលគាត់សម្រេចបាននៅទីនេះ ពិតជាមានឥទ្ធិពលលើការសម្រេចចិត្តរបស់ខ្ញុំ ខ្ញុំតែងតែចង់មកទីនេះ»។
«ខ្ញុំតែងតែសង្ឃឹមថា ថ្ងៃណាមួយខ្ញុំនឹងអាចសម្រេចក្តីសុបិនរបស់ខ្ញុំតាំងពីខ្ញុំនៅក្មេង ដើម្បីចូលរួមជាមួយក្រុម Barça។ យើងទាំងអស់គ្នាមានរបៀបលេងខុសៗគ្នា ដូច្នេះខ្ញុំពិតជាខុសពី Ronaldinho»
Ronaldinho បានចូលរួមជាមួយ Barcelona ពី PSG នៅរដូវក្តៅឆ្នាំ 2003។ វីរបុរសប្រេស៊ីលរូបនេះបានឈ្នះពានរង្វាន់ La Liga ចំនួនពីរ និងពានរង្វាន់ Champions League ជាលើកទីពីររបស់ក្លឹបជាមួយនឹងក្រុម Barcelona ខណៈពេលដែលគាត់ក៏បានឈ្នះពានរង្វាន់ Ballon d’Or ឆ្នាំ 2005 ផងដែរ៕
