អ្នកចាត់ការ Liverpool លោក Jurgen Klopp ជឿជាក់ថា Chelsea អាចនឹងឈ្នះពាន Premier League នៅរដូវកាលក្រោយ។ អ្នកចាត់ការសញ្ជាតិអាឡឺម៉ង់ បានបញ្ជាក់ថា ក្រុមតោខៀវមានភាពខ្លាំង ហើយនឹងប្រជែងយកពានបាននៅរដូវកាលក្រោយ។
ថ្លែងទៅកាន់ ESPN អ្នកចាត់ការសញ្ជាតិអាល្លឺម៉ង់ បានបង្ហាញពីរបៀបដែលគាត់គិតចំពោះក្រុមរបស់លោក Thomas Tuchel ដោយនិយាយថា៖
«នៅពេលយើងប្រកួតជាមួយ Chelsea យើងមិនបានឈ្នះមួយប្រកួតណានោះទេ។ ហើយនោះមិនមែនដោយសារតែយើងលេងមិនបានល្អនៅថ្ងៃនោះទេ។ យើងពិតជាធ្វើបានល្អនៅក្នុងការប្រកួតទាំងនោះ។ នៅទីបញ្ចប់ ជាមួយនឹងការស៊ុតបាល់ប៉េណាល់ទី យើងអាចឈ្នះវាបាន ប៉ុន្តែក្នុងរយៈពេល 90 នាទីពេញ យើងមិនអាចយកឈ្នះបានទេ។ ដូច្នេះវាបង្ហាញថា Chelsea គឺខ្លាំងមិនគួរឱ្យជឿ»។
គួររំលឹកឡើងវិញដែរថា ក្រុមតោខៀវបានបញ្ចប់ក្នុងចំណាត់ថ្នាក់លេខ 3 កាលពីរដូវកាលមុន ដោយមាន 18 ពិន្ទុតាមពីក្រោយក្រុមហង្សក្រហម និង 19 ពិន្ទុតាមពីក្រោយក្រុមជើងឯក Manchester City ៕
