ខ្សែប្រយុទ្ធឆ្នើម Cristiano Ronaldo របស់ក្រុម Manchester United បានសម្តែងនូវក្តីរីករាយយ៉ាងក្រៃលែង បន្ទាប់ពីស៊ុតបាន Hat-trick ជាលើកទី 60 របស់គាត់ក្នុងអាជីព។
កីឡាករវ័យ 37 ឆ្នាំរូបនេះបានស៊ុតបញ្ចូលទីទាំងបីគ្រាប់សម្រាប់ Manchester United ក្នុងជ័យជម្នះ 3-2 លើក្រុម Norwich City កាលពីថ្ងៃសៅរ៍ក្នុងក្របខ័ណ្ឌ Premier League ។
វាជាគ្រាប់បាល់ Hat-trick លើកទីពីរក្នុងរដូវកាលនេះ ដោយលើកទីមួយធ្វើបានជាមួយក្រុម Tottenham Hotspur ក្នុងខែមីនា។ តារាឆ្នើមសញ្ជាតិព័រទុយហ្គាល់រូបនេះ បច្ចុប្បន្នបានស៊ុត Hat-trick ចំនួន 60 លើកសម្រាប់ក្លឹប និងប្រទេសដែលច្រើនជាងគូប្រជែង Lionel Messi ចំនួន 5 ដង។
Ronaldo បានបង្ហោះសារនៅលើបណ្ដាញសង្គម ក្រោយពីការស៊ុតបញ្ចូលទីចុងក្រោយរបស់គាត់ ដោយមានខ្លឹមសារថា៖ «30 hat-trick មុនពេលអាយុ 30ឆ្នាំ និង 30 hat-trick បន្ទាប់ពីអាយុ 30ឆ្នាំ»។
គួររំលឹកឡើងវិញផងដែរថា Ronaldo គឺជាកីឡាករ Manchester United ដំបូងគេដែលសម្រេចបាន hat-trick ពីរលើកក្នុងផ្ទះរបស់ខ្លួន និងជាកីឡាករដំបូងគេនៅ Premier League ចាប់តាំងពី Sergio Aguero ធ្វើបានក្នុងឆ្នាំ 2019។
Cristiano Ronaldo ស៊ុតបញ្ចូលទីបាន 115 គ្រាប់សម្រាប់ជម្រើសជាតិព័រទុយហ្គាល់ ហើយស៊ុតបាន hat-trick ចំនួន 10 លើកសម្រាប់ជម្រើសជាតិរបស់គាត់៕
