កីឡាករ Georginio Wijnaldum ខ្សែបម្រើរបស់ក្រុម Paris Saint-Germain គឺជាកីឡាករម្នាក់ក្នុងចំណោមកីឡាករទាំងប្រាំ ដែលត្រៀមចាកចេញពីក្លឹបនៅរដូវក្តៅនេះ។
PSG បានធ្លាក់ចេញពីការប្រកួត UEFA Champions League ក្រោមថ្វីជើង Real Madrid ក្នុងវគ្គ 16 ក្រុម។ លោក Hadrien Grenier បានរាយការណ៍ថាកីឡាកររបស់ក្លឹបប៉ារីសចំនួន 5 នាក់អាចនឹងចាកចេញពីក្លឹបនៅរដូវក្តៅនេះរួមទាំង Wijnaldum ផងដែរ។
ខ្សែបម្រើសញ្ជាតិហូឡង់រូបនេះ បានចូលរួមជាមួយក្រុមរបស់លោក Mauricio Pochettino កាលពីរដូវក្តៅមុន លើការផ្ទេរដោយគ្មានតម្លៃខ្លួន បន្ទាប់ពីការផុតកំណត់នៃកិច្ចសន្យារបស់គាត់នៅ Liverpool។
Wijnaldum បានជួបការលំបាកក្នុងការស្វែងរកកន្លែងលេង នៅក្នុងក្រុម PSG ហើយគាត់អាចនឹងផ្លាស់ប្តូរម្តងទៀតនៅរដូវក្តៅនេះ។
កីឡាករម្នាក់ទៀតដែលអាចចាកចេញគឺ Julian Draxler ។ កីឡាករអន្តរជាតិអាឡឺម៉ង់រូបនេះ បានចូលរួមជាមួយក្លឹបបារាំងពីក្លឹប Wolfsburg ក្នុងឆ្នាំ 2017 ប៉ុន្តែបានជួបបញ្ហាជាមួយនឹងជម្រើសដំបូងរបស់ក្រុម។
គាត់ត្រូវបានគេប្រើប្រាស់តិចតួចក្នុងរដូវកាលនេះផងដែរ ដោយ Draxler បង្ហាញខ្លួនបានតែ 24 ដងប៉ុណ្ណោះក្នុងរដូវកាលនេះ ដែលភាគច្រើនជាកីឡាករបម្រុងនៅតង់ទីពីរ។ បច្ចុប្បន្ន Draxler មានអាយុត្រឹមតែ 28 ឆ្នាំប៉ុណ្ណោះ ហើយអាចចាប់ផ្តើមអាជីពនៅកន្លែងផ្សេងទៀត។
Draxler បានសារភាពថាគាត់ត្រូវការពេលវេលាលេងបន្ថែមទៀត មុនការប្រកួតបាល់ទាត់ពិភពលោកនៅប្រទេស Qatar ដែលនឹងត្រូវធ្វើឡើងនៅចុងឆ្នាំនេះ។ គាត់បានប្រាប់ទៅកាន់ក្លឹបថា៖ «ខ្ញុំត្រូវការពេលវេលាលេងបន្ថែមទៀតសម្រាប់ World Cup។ យើងនឹងឃើញថាមានអ្វីកើតឡើងនៅរដូវក្ដៅនេះ»។
ខ្សែការពារស្តាំ Colin Dagba ក៏អាចនឹងត្រូវចាកចេញ ព្រោះថាពិបាកប្រជែងជាមួយ Achraf Hakimi សម្រាប់ជម្រើសដំបូងនៅក្នុងតំណែងនោះ។ Dagba ត្រូវបានកាត់បន្ថយមកត្រឹមតែបីប្រកួតក្នុង Ligue 1 នៅរដូវកាលនេះ ដូច្នេះហើយអាចនឹងស្វែងរកក្លឹបថ្មីដើម្បីលេង។
អតីតប្រធានក្រុម Inter Milan កីឡាករ Mauro Icardi ក៏អាចនឹងចាកចេញដែរ ដោយសារបញ្ហារបស់គាត់នៅក្លឹប។ គាត់ពិបាកនឹងប្រជែងសម្រាប់ជម្រើសដំបូងជាមួយនឹង Lionel Messi, Neymar, Kylian Mbappe និង Angel Di Maria ។
Abdou Diallo ដែលបានចូលរួមជាមួយក្លឹបយក្ស Ligue 1 ពីក្លឹប Borussia Dortmind ក្នុងឆ្នាំ 2019 បានបង្ហាញខ្លួនត្រឹមតែ 72 ប្រកួតប៉ុណ្ណោះសម្រាប់ក្លឹប ហើយគាត់អាចនឹងចាកចេញពីក្លឹបប៉ារីសនៅរដូវក្តៅនេះដែរ៕
