មហាសេដ្ឋីរុស្ស៊ីលោក Roman Abramovich ត្រូវបានគេរាយការណ៍ថាបានបើកការពិភាក្សាដើម្បីទិញក្លឹបទួរគី Goztepe។ មហាសេដ្ឋីរូបនេះបានដាក់លក់ក្លឹប Chelsea នៅដើមខែមីនា ដោយសារការដាក់ទណ្ឌកម្មដោយរដ្ឋាភិបាលចក្រភពអង់គ្លេស ព្រោះតែទំនាក់ទំនងរបស់គាត់ជាមួយប្រធានាធិបតីរុស្ស៊ីលោក Vladimir Putin ។
យោងតាមកាសែតទួរគី Fanatik បានឲ្យដឹងថា ការពិភាក្សាកំពុងដំណើរការរវាងអ្នកតំណាងរបស់ Abramovich និងលោក Mehmet Sepil ម្ចាស់ក្លឹប Goztepe ដែលលេងនៅទួរគី Super Lig ។
កាសែតខាងលើបានចេញផ្សាយថា ការចរចាបន្ទាប់នឹងប្រព្រឹត្តទៅក្នុងរយៈពេលប៉ុន្មានថ្ងៃខាងមុខ ខណៈដែលភាគីទាំងពីរសម្លឹងរកការឈានដល់កិច្ចព្រមព្រៀងមួយ។ រឿងនេះវាបានកើតឡើងបន្ទាប់ពីលោក Mehmet Sepil បានប្រកាសថាគាត់នឹងចាកចេញពីក្លឹប Goztepe នៅចុងបញ្ចប់នៃរដូវកាលនេះ៕
