Manchester United ត្រូវបានគេរាយការណ៍ថាចាប់អារម្មណ៍ក្នុងការចុះហត្ថលេខាលើខ្សែបម្រើ Frenkie de Jong របស់ Barcelona នៅក្នុងទីផ្សារដោះដូរកីឡាកររដូវក្តៅខាងមុខនេះ។ យោងតាមរបាយការណ៍ពី El Nacional ថ្មីៗនេះ Man United ចាត់ទុក De Jong ជាអ្នកជំនួស Paul Pogba ខណៈដែលកិច្ចសន្យារបស់កីឡាករសញ្ជាតិបារាំងនឹងផុតកំណត់នៅរដូវក្តៅនេះ។
ជាមួយនឹងការតែងតាំង Xavi Hernandez ជាអ្នកចាត់ការថ្មីរបស់ Barca បានធ្វើឲ្យ Frenkie de Jong ប្រែក្លាយទៅជាសមាជិកដែលមិនអាចខ្វះបានក្នុងក្រុម។ De Jong បានស៊ុតបញ្ចូលទី និងបង្កើតឱកាសគ្រាប់បាល់មួយចំនួន។ Xavi បានបញ្ជាក់យ៉ាងច្បាស់ថាគាត់ចង់ឱ្យកីឡាករអន្តរជាតិហូឡង់ក្លាយជាផ្នែកមួយនៃអនាគតរបស់ក្លឹប។
ទោះបីជាយ៉ាងណាក៏ដោយ យោងតាមរបាយការណ៍ថ្មីៗនេះ Frenkie de Jong ត្រូវបានគេនិយាយថាមិនប្រាកដអំពីការបន្តនៃការជឿទុកចិត្តរបស់ Xavi លើគាត់ឡើយ។ លើសពីនេះទៅទៀត ការកើនឡើងនៃយុវជនមកពីសាលា La Masia គឺ Pablo Gavi, Nico Gonzalez និង Pedri Gonzalez អាចកាត់បន្ថយពេលវេលានៃការប្រកួតរបស់អតីតកីឡាករ Ajax រូបនេះ។
Frenkie de Jong ត្រូវបានគេនិយាយថាកំពុងពិចារណាលើជម្រើសរបស់គាត់ ហើយក្លឹបនៅអឺរ៉ុបមួយចំនួនបានផ្តល់ប្រាក់ឈ្នួលដ៏គួរឱ្យទាក់ទាញដល់គាត់ រួមទាំង Manchester United ផងដែរ។ ក្លឹបយក្សនៅ Premier League ចាត់ទុកខ្សែបម្រើ Barca ជាអ្នកជំនួស Paul Pogba ។
Man Utd មានលទ្ធភាពក្នុងការផ្តល់ប្រាក់ឈ្នួលដ៏ច្រើនដែល Barcelona មិនអាចធ្វើបាននៅពេលនេះ។ ប្រសិនបើការចាប់អារម្មណ៍កាន់តែខ្លាំង Barca អាចពិចារណាលក់ De Jong ក្នុងតម្លៃប្រមាណ ៨០ លានផោន៕
