អតីតកីឡាករជើងចាស់លោក Paul Ince យល់ឃើញថាកីឡាករ Luis Diaz នឹងអាចក្លាយជា Legend ប្រចាំក្លឹប នាពេលអនាគត ទោះបីគេទើបផ្ទេរមកចូលរួមក្រុមក៏ដោយ។
ខ្សែប្រយុទ្ធកូឡុំប៊ី Luis Diaz ដែលត្រូវបានហង្សក្រហម ទិញចេញពីក្លឹបព័រទុយហ្គាល់ នៅតម្លៃប្រមាណ ៦០ លានអឺរ៉ូ កាលពីពេលកន្លង ទៅ។ ក្នុងនោះមានទាំង Barcelona និង Tottenham Hotspur ក៏ចាប់ចិត្តលើកីឡាករខាងលើផងដែរ តែចុងក្រោយត្រូវបាន Liverpool ប្រជែងយកឈ្នះ។
យ៉ាងណាមិញលោក Paul Ince បាននិយាយថា៖ “Diaz គេជាកីឡាករដ៏ល្អម្នាក់ ខ្ញុំមើលគេលេងតាំងពីកាលនៅ Porto ហើយខ្ញុំគិតថា គេជាកីឡាករដ៏ពិសេស តាមរយៈការដែលក្លឹបទិញយក Jota និង Diaz តើនេះមានន័យថា Salah និង Mane ប្រហែលជាទៅមែនទេ”។
លោកបន្ត៖ “សម្រាប់ Diaz ពិតណាស់គេនឹងរកបានគ្រាប់បាល់ គេនឹងបង្កើតឱកាស មើលតែថ្ងៃលេងប៉ះ Leicester ទៅ គេលេងស៊ីចង្វាក់ ប្រៀបដូចកីឡាករនៅក្លឹប ៤ ទៅ ៥ ឆ្នាំទៅហើយ នេះគេមានតែល្អឡើង ហើយអ្នកគាំទ្រនឹងស្រលាញ់ពេញចិត្តដោយ Diaz ងាយនឹងក្លាយជា Legend មួយរូបនៅ Liverpool”។
គួរជម្រាបថា មកទល់ពេលនេះកីឡាករវ័យ ២៥ ឆ្នាំរូបនេះ បានបង្ហាញខ្លួនសរុប ១២២ នាទីហើយលើទីលាន ឲ្យក្រុមក្រោមដឹកនាំដោយលោក Jurgen Klopp៕
