Neymar បានចូលរួមក្នុងការហ្វឹកហាត់ជាមួយ Paris Saint-Germain វិញហើយកាលពីថ្ងៃ ព្រហស្បតិ៍ ខណៈក្រុមនឹងប្រកួត Champions League វគ្គ ១៦ ក្រុមចុងក្រោយជើង ១ ជាមួយ Real Madrid នៅសប្តាហ៍ក្រោយ។
កីឡាករសញ្ជាតិប្រេស៊ីលវ័យ ៣០ ឆ្នាំរូបនេះ មិនបានលេងឱ្យ PSG ទេចាប់តាំងពីថ្ងៃទី ២៨ ខែវិច្ឆិកា បន្ទាប់ពីបានរបួសកជើងខាងឆ្វេងអំឡុងពេលប្រកួតឈ្នះ ៣-១ លើក្រុម Saint-Etienne ដែលធ្វើឲ្យរូបគេអវត្តមានសរុប ១២ ប្រកួតរួចមកហើយ ។
យ៉ាងណាមិញ ជុំវិញស្ថានភាពរបស់ Neymar អ្នកចាត់ការ PSG លោក Mauricio Pochettino បានបញ្ជាក់ថា Neymar នៅពេលនេះមានភាពល្អប្រសើរច្រើន តែគេមិនអាចចូលលេងឡើយនៅពេល PSG ជួប Rennes ក្នុងក្របខណ្ឌបារាំង Ligue 1 យប់នេះ។
អ្នកចាត់ការសញ្ជាតិអាហ្សង់ទីនរូបនេះ ក៏មិនទាន់អាចបញ្ជាក់បានដែរថា Neymar នឹងអាចចូលលេងបាន រឺអត់ នៅពេល PSG ជួប Real Madrid នៅវគ្គ ១៦ ក្រុមចុងក្រោយ UEFA Champions League នៅថ្ងៃទី ១៥ ខែកុម្ភៈ នៅឡើយទេ៕
