យោងតាមវិទ្យាស្ថានស្រាវជ្រាវ ដែលមានមូលដ្ឋាននៅប្រទេសស្វីស CIES Football Observatory បានឱ្យដឹងថា Manchester United មានការបាត់បង់ការផ្ទេរដ៏ធំបំផុត នៅទ្វីបអឺរ៉ុបក្នុងទសវត្សរ៍ចុងក្រោយនេះ។ នេះបើយោងតាមប្រភពពីសារព័ត៌មាន BBC ។
ចាប់តាំងពីឆ្នាំ ២០១២ ក្រុម Man Utd មានការចំណាយច្រើនជាងមួយពាន់លានអឺរ៉ូ ដែលច្រើនជាងគូប្រជែង Manchester City។ ការសិក្សាបានបង្ហាញថាបិសាចក្រហមបានចំណាយប្រាក់ ១,៥៤៥ ពាន់លានអឺរ៉ូ លើការផ្ទេរ ហើយទទួលបានមកវិញ ៤៧០ លានអឺរ៉ូនៅក្នុងការលក់កីឡាករ។
Man Utd បានបំបែកកំណត់ត្រាផ្ទេរនៅ Premier League នៅពេលដែលពួកគេបានចុះហត្ថលេខាលើកីឡាករ Paul Pogba ក្នុង ឆ្នាំ ២០១៦ ក្នុងតម្លៃ ៨៩,៥ លានផោន ហើយគ្រោងនឹងមិនទទួលបានអ្វីមកវិញសោះ សម្រាប់ខ្សែបម្រើរូបនេះ ដែលកិច្ចសន្យានឹងផុតកំណត់នៅចុងបញ្ចប់នៃរដូវកាលនេះ។
ការចុះហត្ថលេខាដែលមានតម្លៃថ្លៃផ្សេងទៀតរួមមាន Anthony Martial (៣៦ លានផោន ) ក្នុងឆ្នាំ ២០១៥ និង Donny van de Beek (៤០ លានផោន ) ក្នុងឆ្នាំ ២០២០ ។ កីឡាករទាំង ២ បានចាកចេញក្នុងលក្ខខ័ណ្ឌខ្ចីជើង ក្នុងទីផ្សារដោះដូរកីឡាករខែមករា។
ចំណែកម្ចាស់ជើងឯក Premier League គឺក្រុម Man City ឈរនៅលេខរៀងទី ២ ក្នុងតារាងជាមួយនឹងការចំណាយ ៩៨៤ លានអឺរ៉ូ ។ ក្រុមនេះបានចំណាយ ១,៦៩៩ ប៊ីលានអឺរ៉ូ លើកីឡាករក្នុងទសវត្សរ៍មុន ប៉ុន្តែបានលក់ត្រលប់មកវិញជាមួយទឹកប្រាក់ ៧១៥ ប៊ីលានអឺរ៉ូ ។
ដោយឡែក Paris St-Germain ជាប់ចំណាត់ថ្នាក់លេខ ៣ ដោយបានចំណាយ ៩១៤ លានអឺរ៉ូ និង Barcelona លេខ ៤ ដែលមាន ៦៥០ លាន ។ Arsenal បានបញ្ចប់ក្នុងចំណាត់ថ្នាក់កំពូលទាំង ៥ ជាមួយនឹងការចំណាយ ៥៨៣ លាន ៕
