លោក Zinedine Zidane ចង់មានការជួបជុំជាមួយកំពូលខ្សែប្រយុទ្ធ Cristiano Ronaldo ប្រសិនបើលោកចូលកាន់តំណែងនៅ Paris Saint-Germain នៅរដូវក្តៅ ។
គ្រូបង្វឹក PSG បច្ចុប្បន្ន លោក Mauricio Pochettino កំពុងប្រឈមមុខនឹងអនាគតមិនច្បាស់លាស់ នៅក្នុងកីឡដ្ឋាន Parc des Princes ជាមួយនឹងរបាយការណ៍ថ្មីៗនេះ បានអះអាងថា គ្រូបង្វឹកសញ្ជាតិអាហ្សង់ទីនរូបនេះ កំពុងរៀបចំចាកចេញមុនរដូវកាល ២០២២-២៣ ។
PSG ត្រូវបានគេជឿថាលោក Zidane គឺជាគោលដៅទី ១ របស់ពួកគេ ដើម្បីជំនួសតំណែងលោក Pochettino ប្រសិនបើគាត់ចាកចេញនៅរដូវក្តៅនេះ បើទោះបីជាមានការអះអាងថា អតីតគ្រូបង្វឹក Real Madrid រូបនេះកំពុងសម្រាកសម្រាប់ការងារនៅប្រទេសបារាំងក៏ដោយ ។
ទោះជាយ៉ាងណាក៏ដោយ យោងតាមកាសែត The Mirror បានអះអាងថាលោក Zidane ត្រូវបានតែងតាំងជាអ្នកចាត់ការក្លឹបយក្សបារាំង ហើយភារកិច្ចដំបូងរបស់គ្រូបង្វឹកសញ្ជាតិបារាំងរូបនេះ គឺដើម្បីទាក់ទាញ Ronaldo ឱ្យចាកចេញពី Manchester United ។
របាយការណ៍បន្ថែមថា Ronaldo អាចត្រូវបានល្បួងដោយខ្សែប្រយុទ្ធជួរមុខ Neymar និង Lionel Messi នៅ Parc des Princes ខណៈ Kylian Mbappe ត្រូវបានគេរំពឹងថា នឹងបញ្ចប់ការផ្ទេរដោយគ្មានតម្លៃខ្លួនទៅកាន់ Real Madrid ។
សូមជម្រាបថា បច្ចុប្បន្ននេះ Ronaldo នៅជាប់កុងត្រាជាមួយបិសាចក្រហមរហូតដល់ឆ្នាំ ២០២៣ ជាមួយនឹងជម្រើសបន្ថែម ១២ ខែទៀត ហើយ Man Utd ត្រូវបានគេគិតរួចហើយថា នឹងរៀបចំផែនការសម្រាប់ការចាកចេញរបស់ Ronaldo ដោយយកកីឡាករ Alexander Isak របស់ Real Sociedad មកជំនួសវិញ៕
