ខ្សែបម្រើមាឌល្អិតចិត្តធំ Fred របស់ក្រុម Manchester United បានច្រានចោលរបាយការណ៍ដែលថា មានកីឡាករជាច្រើន រួមទាំងខ្លួនគាត់ផងដែរ គឺមិនសប្បាយចិត្តនៅ Old Trafford ដោយចាត់ទុកពាក្យចចាមអារ៉ាមថា “ព័ត៌មានក្លែងក្លាយ” ។
ក្លឹបបិសាចក្រហម បានស៊ូទ្រាំនឹងយុទ្ធនាការដ៏លំបាកមួយ បើទោះបីជាត្រូវបានចាត់ទុកថាជាគូប្រជែងដណ្តើមពាន មុនពេលរដូវកាលចាប់ផ្តើម ដោយលោក Ole Gunnar Solskjaer ត្រូវបានបណ្តេញចេញនៅចុងខែវិច្ឆិកា ហើយក៏បានតែងតាំងគ្រូបង្វឹកបណ្តោះអាសន្នលោក Ralf Rangnick។
ជាក់ស្ដែង បន្ទាប់ពីចាញ់ Wolves កាលពីលើកមុន Man Utd នៅតែស្ថិតក្នុងចំណាត់ថ្នាក់ទី 7 ក្នុងតារាង Premier League ហើយទម្រង់នៃការខកចិត្តរបស់ពួកគេបានជំរុញឱ្យមានរលកនៃរឿងរ៉ាវដែលបង្ហាញពីការមិនសប្បាយចិត្តជាច្រើននៅក្នុងក្រុម។
យោងតាមកាសែត Daily Mail ថាមានកីឡាករ 17 នាក់មិនសប្បាយចិត្ត និងធុញទ្រាន់នឹងស្ថានភាពរបស់ក្លឹបបច្ចុប្បន្ន ទើបធ្វើឲ្យពួកគេចង់ចាកចេញ។
ទោះជាយ៉ាងណាក៏ដោយ Fred បានចេញមុខឆ្លើយតបនឹងរបាយការណ៍ ហើយទទូចថាគាត់ “រីករាយណាស់” នៅ United ហើយមិនដែលបង្ហាញពីបំណងចង់ចាកចេញនោះទេ ខណៈពេលដែលគាត់ក៏បានការពារមិត្តរួមក្រុមរបស់គាត់ និងទទូចឱ្យកីឡាករគ្រប់គ្នារួបរួមគ្នា។
គួរបញ្ជាក់ថា Paul Pogba, Jesse Lingard និង Anthony Martial ក៏បានសុំចាកចេញពី Old Trafford ក្នុងខែនេះផងដែរ៕
