ភ្នំពេញ៖ ក្រោយលីគបាល់ទាត់កំពូលរបស់កម្ពុជាប្រកាសប្តូរឈ្មោះជា Cambodia Premier League កាលពីថ្ងៃទី៦ ខែមករា ឆ្នាំ២០២២។ ក្នុងនោះក្រុម ដែលលេងរាល់ដងទាំង ១៣ក្រុម គឺត្រូវកាត់ចោល ៥ក្រុម នៅសល់តែ ៨ក្រុមប៉ុណ្ណោះដែលមានសិទ្ធលេង នៅ Cambodia Premier League។
ក្រុមទាំង ៨នោះរួមមាន ព្រះខ័នរាជស្វាយរៀង បឹងកេត វិសាខា ភ្នំពេញក្រោន ណាហ្គាវើលដ៍ កងយោធពលខេមរភូមិន្ទ គិរីវង្សសុខសែនជ័យ និងអង្គរថាយហ្គឺរ ។ ចំណែកក្រុម ៥ដែលត្រូវកាត់ទៅលេងនៅលីគទី២ រួមមាន ព្រៃវែង សូលទីឡូអង្គរ អគ្គីសនីកម្ពុជា អាស៊ីអឺរ៉ុប និងនគរបាលជាតិ។
ចំពោះការសម្រេចចិត្តកាត់ក្រុមទាំង ៥នេះ ទៅកាន់លីគទី២ ដោយសារតែ មិនទាន់គ្រប់លក្ខណៈវិនិច្ឆ័យ ស្ដង់ដារបស់ ក្រុមហ៊ុនលីគកំពូលកម្ពុជា ។ ដោយឡែកបើតាមប្រភពក្រៅផ្លូវការណ៍បានបញ្ជាក់ថា មូលហេតុដែលកាត់នោះ គឺដោយសារតែអាជ្ញាប័ណ្ណក្លិបពីសហព័ន្ធជាតិ និង AFC, កីឡដ្ឋានផ្ទាល់ខ្លួន, ហិរិញ្ញវត្ថុទ្រទ្រង់ក្លិប និងគ្រូដែលមានអាជ្ញាប័ណ្ណអន្តរជាតិ ៕
