ជាការពិតណាស់ ទីផ្សារដោះដូររដូវរងាសម្រាប់ឆ្នាំ ២០២២ គេជឿថាខាងក្លឹប Liverpool ទំនងជានឹងផ្តោតខ្លាំងលើការបំពេញតំបន់ប្រយុទ្ធ ពោលយកមកប្រើប្រាស់រយៈពេលខ្លី ព្រោះអីដូចគ្រប់គ្នាបានដឹងស្រាប់ហើយគឺ Sadio Mane និង Mohamed Salah ពួកគេត្រូវជាប់ភារកិច្ចទៅជួយជម្រើសជាតិ នៅព្រឹត្តិការណ៍ Africa Cup of Nation។
ជាក់ស្តែង Mane ត្រូវទៅជួយសេណេហ្គាល់ ខណៈដែល Salah ត្រូវទៅជួយអេហ្សីប ហើយពួកគេបានចេញដំណើរពីចក្រភពអង់គ្លេសតាំងពីចប់ការប្រកួតទល់ Chelsea នាចុងសប្តាហ៍។ ដូច្នេះមានន័យថា ប្រកួតបន្តបន្ទាប់ទៅមុខ ហង្សក្រហមនឹងមិនសូវមានប្រព័ន្ធប្រយុទ្ធមុតស្រួចទេ ហើយចន្លោះអវត្តមានរយៈពេលជាង ១ ខែ ឬច្រើនជាង ៤ ប្រកួតបន្ទាប់នេះ លោក Klopp ចង់ប៉ះប៉ូវមកវិញ តាមរយៈការនាំយក Eden Hazard ពី Real Madrid។
យោងតាមសារព័ត៌មាន El Nacional ចុះផ្សាយថា ក្លឹបដឹកនាំដោយអ្នកចាត់ការសញ្ជាតិអាល្លឺម៉ង់ បានចាប់អារម្មណ៍កីឡាករបែលហ្សិករបស់ក្លឹបអេស្ប៉ាញ Real Madrid ដោយលោកគិតថាសមត្ថភាព Hazard គឺអាចមកជួយ Liverpool បាននៅរដូវកាលសេសសល់។ ជារួមលោក Klopp ពិតជាត្រូវការចាំបាច់ ព្រោះឈរលើគោលដៅប្រជែងពាន PL ជាមួយនឹង Man City ក៏ដូចជា Chelsea។
យ៉ាងណាមិញភាគី Real Madrid នៅមិនទាន់បានឆ្លើយតប ចំពោះការព្រមប្រគល់ Hazard មកឲ្យលោក Klopp ដើម្បីសម្រាលបន្ទុកចំណាយថ្លៃពលកម្ម ឬអត់ទេ ខណៈដែលសុពលភាពកុងត្រារបស់កីឡាករវ័យ ៣០ ឆ្នាំរូបនេះ នឹងត្រូវផុតនៅចុងខែ មិថុនា ឆ្នាំ ២០២៤ ឯណោះ៕
