រូបសំណាកថ្មីរបស់ Cristiano Ronaldo ត្រូវបានគេដាក់បង្ហាញ នៅប្រទេសឥណ្ឌា ក្នុងរដ្ឋ Goa នៅឆ្នេរភាគនិរតីនៃប្រទេស។ ខណៈពេលដែលគំនិតនៅពីក្រោយរូបសំណាកនេះ គឺដើម្បីបំផុសគំនិតយុវជន ប៉ុន្តែភាគច្រើនបានបង្កឱ្យមានការជជែកគ្នា ក្នុងចំណោមសមាជិកនៃសហគមន៍បាល់ទាត់របស់ប្រទេសឥណ្ឌាទៅវិញ។
ទង់ខ្មៅមួយចំនួនត្រូវបានគ្រវីនៅរូបសំណាកជាសញ្ញានៃការការពារ ដោយមានអ្នករិះគន់បានអះអាងថា ទេពកោសល្យបាល់ទាត់ក្នុងស្រុករបស់ឥណ្ឌាគួរតែត្រូវបានគេគោរព ជំនួសឱ្យកំពូលតារាឆ្នើមរបស់ក្រុម Manchester United។
យោងតាមទីភ្នាក់ងារសារព័ត៌មានក្នុងស្រុក IANS បានប្រមូលមតិរបស់អ្នកស្រុកមួយចំនួន ហើយពួកគេបានពន្យល់ពីមូលហេតុដែលពួកគេប្រឆាំងនឹងរូបសំណាកនេះ។
មនុស្សម្នាក់ក្នុងចំនោមអ្នកតវ៉ាបាននិយាយថា៖ «ខ្ញុំពិតជាមានការខកចិត្តយ៉ាងខ្លាំង ដែលបានឮអំពីរូបសំណាករបស់ Ronaldo ត្រូវបានសាងសង់ឡើង យើងគួរតែមានមោទនភាពចំពោះរូបតំណាងរបស់កីឡាករយើងដូចជា Samir Naik និង Bruno Coutinho» ។
ម្យ៉ាងវិញទៀត រូបសំណាកនេះ ក៏កំពុងបង្ហាញពីភាពចម្រូងចម្រាសផងដែរ ដោយសារតែខែធ្នូនេះ គឺជាខួបលើកទី ៦០ ចាប់តាំងពីកងទ័ពឥណ្ឌា ដណ្តើមបានរដ្ឋ Goa ពីព័រទុយហ្គាល់វិញ។ ដោយមានការប្រារព្ធពិធីនៅខែនេះ ដែលជាកាលបរិច្ឆេទដ៏សំខាន់នៅក្នុងប្រវត្តិសាស្ត្រក្នុងតំបន់។
ជាមួយនឹងការដាក់បង្ហាញរូបសំណាកនាពេលនេះ អ្នកខ្លះចាត់ទុកការដំឡើងកិត្តិយសដល់រូបសំណាកជនជាតិព័រទុយហ្គាល់ថា ជាការប្រមាថដល់អ្នកដែលបានតស៊ូទាមទារឯករាជ្យ ទោះបីជាមានវប្បធម៌គាំទ្រក្រុមព័រទុយហ្គាល់ ក្រុមជម្រើសជាតិព័រទុយហ្គាល់ និងតារាឆ្នើមព័រទុយហ្គាល់ក៏ដោយ។
យ៉ាងណាមិញ Cristiano Ronaldo មិនទាន់បញ្ចេញមតិជាសាធារណៈ ឬបង្ហាញការទទួលស្គាល់រូបសំណាកដ៏ចម្រូងចម្រាសនេះនៅឡើយទេ។ ហើយនេះ ក៏មិនមែនជារូបសំណាក Ronaldo ដំបូងគេដែរ ដែលបានដាក់តាំងបង្ហាញកាលពីឆ្នាំ ២០១៧ នៅអាកាសយានដ្ឋាន Madeira ត្រូវបានគេចំអកថាមិនដូចទៅនឹងកីឡាករបាល់ទាត់នោះទេ៕
