ម្ចាស់ពាន Ballon d’Or ប្រាំពីរសម័យកាល កីឡាករ Lionel Messi បានផ្ញើរសារលើកទឹកចិត្តទៅកាន់មិត្តរួមជាតិ Sergio Aguero បន្ទាប់ខ្សែប្រយុទ្ធរបស់ក្រុម Barcelona រូបនេះ ប្រកាសអំពីការចូលនិវត្តន៍ពីវិស័យបាល់ទាត់របស់ខ្លួនកាលពីថ្ងៃ ពុធកន្លងទៅ។
គួររំលឹកថា Aguero បានផ្លាស់មកកាន់ Barcelona នៅរដូវកាលនេះ ដោយគាត់រំពឹងថានឹងអាចចាប់ដៃគូគ្នានៅលើទីលានជាមួយមិត្តភក្តិល្អបំផុតនោះគឺ Messi ប៉ុន្តែដោយសារតែក្លិបអ្នកមានបុណ្យបានជួបនូវវិបត្តិហិរញ្ញវត្ថុ ទើបមិនអាចឱ្យ Messi បន្តកុងត្រាថ្មីបាន រហូតចុងក្រោយគាត់ធ្វើការផ្ទេរមកចូលរួមជាមួយក្រុម Paris Saint-Germain។
យ៉ាងណាមិញ ក្រោយ Aguero ប្រកាសចូលនិវត្តន៍ពីបាល់ទាត់ Messi បានផ្ញើសារយ៉ាងដូច្នេះថា៖ «ពួកយើងបានចាប់ផ្តើមអាជីពជាមួយគ្នា Aguero យើងធ្លាប់មានពេលវេលាដ៏អស្ចារ្យជាមួយគ្នាមួយចំនួន ហើយពេលខ្លះក៏មានរឿងមិនល្អខ្លះដែរ ប៉ុន្តែរឿងទាំងអស់នេះហើយ ដែលធ្វើឱ្យយើងកាន់តែជិតស្និទ្ធ និងមានទំនាក់ទំនងជាមួយគ្នាកាន់តែល្អជាងមុន។ ជាពិសេស គឺនៅពេលដែលពួកយើងចំណាយពេលលេងបាល់ទាត់ជាមួយគ្នានៅលើទីលាន។ វាជាសករាជថ្មីមួយដែលល្អបំផុត! ខ្ញុំពិតជាស្រឡាញ់អ្នកខ្លាំងណាស់មិត្តភក្តិរបស់ខ្ញុំ ខ្ញុំនឹងចងចាំរឿងទាំងអស់ដែលពួកយើងបានធ្វើជាមួយគ្នានៅលើទីលាន ពោលគឺនៅពេលដែលពួកយើងបានជួបគ្នានៅក្រុមជម្រើសជាតិ»៕
សូមទស្សនាវីដេអូខាងក្រោម៖
