បរទេស៖ សារព័ត៌មានអេស្ប៉ាញបានរាយការណ៍កាលពីថ្ងៃសៅរ៍ថា អតីតគ្រូក្រុមយុវជនរបស់ ក្លឹបបាល់ទាត់ Barcelona លោក Albert Benaiges ត្រូវបានចោទប្រកាន់ពីបទរំលោភផ្លូវភេទលើអតីតសិស្សរាប់សិបនាក់ នៅសាលាមួយដែលគាត់ធ្វើការនៅទីក្រុង Barcelona ។
នេះបើយោងតាមកាសែតកាតាឡាន ARA បានរាយការណ៍ថា អតីតសិស្សរបស់ Benaiges ជាង 60 នាក់បានចោទប្រកាន់គាត់ថាបានបំពានផ្លូវភេទពួកគេខណៈពេលដែលគាត់ជាគ្រូបង្រៀនផ្នែកអប់រំកាយនៅសាលារបស់ពួកគេ។ ខណៈពេលនេះលោក Benaiges បានបដិសេធចំពោះការចោទប្រកាន់នេះ ថាមិនបានប្រព្រឹត្តិខុសនោះទេ។
ក្នុងនោះគ្រូបង្វឹកបច្ចុប្បន្នរបស់ក្រុម Barcelona លោក Xavi Hernandez បានបញ្ជាក់នៅថ្ងៃសៅរ៍កន្លងមកនេះថា អាជ្ញាធរនៅភាគឦសាននៃប្រទេសអេស្ប៉ាញបាននឹងកំពុងបើកការស៊ើបអង្កេតទៅលើការរឿងនេះ។ Xavi បន្ថែមថាគាត់ “ភ្ញាក់ផ្អើល” យ៉ាងខ្លាំងក្រោយទទួលបានព័ត៌មាននេះភ្លាមៗ។
គួរបញ្ជាក់ថាលោក Benaiges វ័យ 71 ឆ្នាំ គឺជាសមាជិកដ៏សំខាន់នៃសាលាបណ្តុះបណ្តាលយុវជនរបស់ Barcelona ចន្លោះឆ្នាំ 1991-2011 ស្របពេលជាមួយនឹងជំនាន់នៃកីឡាករល្អបំផុតរបស់ក្លឹប រួមទាំង Andres Iniesta និង Xavi ។
លោក Xavi បាននិយាយនៅក្នុងសន្និសីទសារព័ត៌មានមុនការប្រកួតថា “ខ្ញុំមិនដឹងថាមានរឿងអ្វីនោះទេ គាត់គឺជាគ្រូបង្វឹករបស់ខ្ញុំ ហើយខ្ញុំក៏មិនដែលមានការសង្ស័យអ្វីនោះទេ។ ខ្ញុំភ្ញាក់ផ្អើល និងស្រឡាំងកាំងខ្លាំងណាស់។ ខ្ញុំមិននឹកស្មានដល់ទេ”។
យ៉ាងណាមិញ លោក Benaiges កំពុងស្ថិតនៅក្រោមការស៊ើបអង្កេត របស់ប៉ូលីសនៅឡើយ៕
ប្រភព៖ សហការី
