យោងតាមសារព័ត៌មានអេស្ប៉ាញ El Nacional បានឲ្យដឹងា Barcelona ស្ថិតក្នុងគ្រោះថ្នាក់យ៉ាងធ្ងន់ធ្ងរក្នុងការបាត់បង់ខ្សែបម្រើកណ្តាល Gavi ខណៈដែល Liverpool មានបំណងចង់ទិញផ្តាច់កុងត្រាក្នុងក្នុងទីផ្សារដោះដូរកីឡាករនាខែមករាខាងមុខនេះ។
Gavi គឺជាតារាឆ្នើមចុងក្រោយបំផុតដែលចេញពីសាលា La Masia ដ៏ល្បីរបស់ Barcelona។ ខ្សែបម្រើវ័យ ១៧ ឆ្នាំរូបនេះគឺជាជម្រើសដំបូងសម្រាប់ក្រុម Barca ហើយគាត់ក៏រកបាន ៤ គ្រាប់ផងដែរសម្រាប់ក្រុមជម្រើសជាតិអេស្ប៉ាញ។ យ៉ាងណាក៏ដោយ Barcelona អាចនឹងបាត់បង់តារាឆ្នើមរបស់ខ្លួនដោយសារតែបាត់ឱកាសក្នុងការប្រកួត Champions League។
យោងតាមប្រភពខាងលើក្លឹប Liverpool បានត្រៀមខ្លួនរួចជាស្រេចក្នុងការទិញផ្តាច់កុងត្រារបស់ Gavi ជាមួយ Barcelona ក្នុងតម្លៃ ៥០ លានអឺរ៉ូ។ អ្នកចាត់ការក្រុម Liverpool លោក Jurgen Klopp បានសម្លឹងឃើញកីឡាករខ្សែបម្រើវ័យ ១៧ ឆ្នាំរូបនេះសម្រាប់ការផ្លាស់ប្តូរខែមករា។ ហង្សក្រហមមើលឃើញថានេះជាការវិនិយោគរយៈពេលវែងដ៏អស្ចារ្យមួយ ដោយសារអាយុនៅវ័យក្មេងរបស់គាត់៕
