ខ្សែប្រយុទ្ធក្រុមបិសាចក្រហម Cristiano Ronaldo បានឆ្លើយតបវិញចំពោះលោក Pascal Ferre ប្រធានអ្នករៀបចំកម្មវិធី Ballon dÓr ដែលបាននិយាយថា គេចង់ឈ្នះពានរង្វាន់ផ្ទាល់ខ្លួនមួយនេះ ឱ្យបានច្រើនជាង Lionel Messi ។
កាលពីសប្ដាហ៍មុននេះលោក Pascal Ferre បានអះអាងថាមហិច្ឆតារបស់ Ronaldo គឺធ្វើយ៉ាងណាអាចឈ្នះពានរង្វាន់ Ballon dÓr ឱ្យបានច្រើនជាងកីឡាករ Messi ក្នុងអាជីពបាល់ទាត់នេះ។ ដោយការនិយាយបែបនេះ បានធ្វើឱ្យ CR7 មិនសប្បាយចិត្តនោះទេ ហើយក៏បានតបតវិញយ៉ាងចាស់ដៃផងដែរ។
ម្ចាស់ពានរង្វាន់ Ballon dÓr ៥សម័យវ័យ ៣៦ឆ្នាំរូបនេះ បាននិយាយថា ៖ «Pascal Ferre និយាយកុហក។ គាត់បា ប្រើឈ្មោះរបស់ខ្ញុំ ដើម្បីប្រម៉ូតខ្លួនគាត់ និងប្រម៉ូតការងារដែលគាត់កំពុងធ្វើ។ វាមិនអាចទទួលយកបានទេ ដែលអ្នកទទួលខុសត្រូវក្នុងការផ្តល់រង្វាន់ ដ៏មានកិត្យានុភាពបែបនេះ អាចកុហកតាមរបៀបនេះ ដោយមិនគោរពជាដាច់ខាត ចំពោះអ្នកដែលតែងតែគោរព France Football និង Ballon d’Or។ថ្ងៃនេះគាត់បានកុហកម្ដងទៀត ចំពោះអវត្ដមានរបស់ខ្ញុំ នៅក្នុងកម្មវិធីប្រគល់ពាន»។
«ខ្ញុំតែងតែចង់អបអរអ្នកឈ្នះ ក្នុងភាពជាអ្នកកីឡា និងយុត្ដិធម៌ដែលវាបានដឹកនាំអាជីពរបស់ខ្ញុំ តាំងពីដើមមក។ ខ្ញុំមិនដែលគិតចង់ប្រឆាំងជាមួយនរណាទេ»៕
