ក្រុមបាល់ទាត់ជម្រើសជាតិហូឡង់ ជាក្រុមចុងក្រោយនៃការប្រកួតវគ្គជម្រុះ FIFA World Cup ដែលលបានកក់សំបុត្រយន្ដហោះ ដើម្បីចូលរួមព្រឹត្តិការណ៍ប្រកួតបាល់ទាត់ពិភពលោកនៅប្រទេសហ្គាតា ក្រោយបញ្ចប់លទ្ធផលជាក្រុមកំពូលតារាងនៃពូល G ដោយយកឈ្នះន័រវែស ២-0 ក្នុងប្រកួតចុងក្រោយ។
គ្រាប់បាល់ចុងម៉ោងពីរគ្រាប់របស់ Steven Bergwijn និង Memphis Depay បានធានាឱ្យក្រុមដែលមានលោក Louis van Gaal ជាគ្រូបង្គោល បានឈរនៅកំពូលតារាងនៃពូល G។ បរាជ័យនេះបានធ្វើឱ្យន័រវែស អស់ឱកាសបានចូលរួមវគ្គ play-off ដោយសារតំណែងលេខ២ក្នុងតារាងបានធ្លាក់ទៅលើដៃ តួកគី។
គួរបញ្ជាក់ថា ហូឡង់ជាក្រុមទី១០ចុងក្រោយ នៅអឺរ៉ុបដែលនឹងចូលរួមប្រកួត World Cup ដោយបញ្ចប់ចំណាត់ថ្នាក់កំពូលតារាងនៃវគ្គចែកពូល ខណៈបច្ចុប្បន្នមានសរុប១២ក្រុមដែលទទួលបានកន្លែងក្នុងចំណោម ៣២ក្រុមសម្រាប់ការប្រកួតបាល់ទាត់ពិភពលោកនៅហ្គាតានៅឆ្នាំក្រោយ៕
