លោក Gareth Southgate គ្រូបង្វឹកក្រុមជម្រើសជាតិអង់គ្លេស បាននិយាយបែបលេងសើចថា លោកសម្រេចចិត្តប្ដូរ ប្រធានក្រុម Harry Kane ចេញពីការប្រកួតទល់នឹង San Marino គឺដោយសារខ្លាចគ្រួសាររបស់អតីតខ្សែប្រយុទ្ធ Wayne Rooney ហៅទូរស័ព្ទមកស្ដីឲ្យលោក។
គួររំលឹកថា កាលពីយប់ថ្ងៃទី ១៦ខែវិច្ឆិកាកន្លងទៅនេះ អង់គ្លេសបានយកឈ្នះក្រុមជម្រើសជាតិ San Marino ដល់ក្នុងដីនូវលទ្ធផល ០ ទល់នឹង១០ ដែលធ្វើឲ្យតោកំណាចអង់គ្លេសបានឡើងទៅលេងនៅព្រឹត្តិការណ៍បាល់ទាត់ពិភពលោក២០២២ នាឯប្រទេសកាតា ដោយស្វ័យប្រវត្ត។
១០គ្រាប់ដែលស៊ុតគឺមាន ខ្សែការពារ Harry Maguire ១គ្រាប់, Filippo Fabbri ស៊ុតចូលទីខ្លួនឯង១គ្រាប់, Harry Kane ដាក់៤គ្រាប់ម្នាក់ឯង, Emile Smith Rowe ១គ្រាប់, Tyron Mings ១គ្រាប់,Tammy Abraham ១ គ្រាប់ និង Bukayo Saka ១គ្រាប់ផងដែរ។
ដោយឡែក ក្នុងការប្រកួតនេះគេសង្កេតឃើញថា Southgate បានប្ដូរ Harry Kane ដែលរកបានដល់ទៅ ៤គ្រាប់ឲ្យចេញពីការប្រកួតនៅនាទីទី ៦៣ ដោយដាក់ខ្សែការពារ Reece James ជំនួស។
គិតមកទល់ពេលនេះ Harry Kane រកបាន ៤៨គ្រាប់ហើយសម្រាប់ក្រុមជម្រើសជាតិអង់គ្លេស ដែលវាស្មើនឹងកំណត់ត្រារបស់លោក Gary Lineker ក្នុងនាមជាកីឡាករដែលស៊ុតបញ្ចូលទីឲ្យជម្រើសជាតិអង់គ្លេសបានច្រើនជាងគេលំដាប់ទី៣។ ដោយឡែកអតីតខ្សែប្រយុទ្ធ Wayne Rooney គឺជាកីឡាករដែលស៊ុតបញ្ចូលទីឲ្យអង់គ្លេសបានច្រើនជាងគេបង្អស់ទើបលោក Southgate ខ្លាចថាបើបន្តដាក់ Kane ឲ្យបន្តចូលលេងទៀតគឺគេអាចតាមស្មើកំណត់ត្រា ៥៣គ្រាប់របស់ Rooney ក៏ថាបាន។
ថ្លែងប្រាប់ ITV លោក Southgate បាននិយាយថា៖ «បើសិនពួកយើងទុកឲ្យគេលេងតែកន្លះម៉ោងទៀត គឺក្រុមគ្រួសាររបស់ Wayne Rooney អាចនឹងហៅទូរស័ព្ទមកកាន់ពួកយើង»៕
សូមទស្សនាវីដេអូខាងក្រោម៖
https://www.youtube.com/watch?v=XkBBNodvEUI
