យោងតាមរបាយការណ៍ពី El Nacional បានឲ្យដឹងថាអ្នកចាត់ការក្លឹប Barcelona លោក Xavi Hernandez បានស្នើសុំក្លឹបចុះហត្ថលេខាលើតារាឆ្នើមម្នាក់របស់ Liverpool គឺកីឡាករ Mohamed Salah នៅរដូវក្តៅក្រោយ។
ក្លឹប Barcelona បានចាប់ផ្តើមរដូវកាលមិនបានល្អ ដែលជាលទ្ធផលបានធ្វើឲ្យអ្នកចាត់ការសញ្ជាតិហូឡង់លោក Ronald Koeman ត្រូវបានបណ្តេញចេញ។ ក្លឹបយក្សកាតាឡានបានជំនួសអ្នកចាត់ការវ័យ ៥៨ឆ្នាំលោក Koeman ជាមួយនឹងវីរបុរសរបស់ក្លឹបគឺ Xavi ។
គ្រូបង្វឹកថ្មីវ័យ ៤១ ឆ្នាំរូបនេះបានត្រៀមឈ្មោះកីឡាករដែលគាត់ចង់ចុះហត្ថលេខា និងកីឡាករមួយចំនួនដែលនឹងត្រូវចាកចេញ។ យោងតាមរបាយការណ៍ខាងលើ កីឡាករម្នាក់ដែល Xavi ចង់នាំយកទៅ Barcelona គឺតារាឆ្នើមរបស់ក្លឹប Liverpool គឺ Mohamed Salah ។
Salah បានចាប់ផ្តើមរដូវកាលថ្មីដ៏អស្ចារ្យ។ ខ្សែប្រយុទ្ធវ័យ ២៩ ឆ្នាំរូបនេះស៊ុតបញ្ចូលទីបាន ១៥ គ្រាប់ និងបញ្ជូនបាល់ឱ្យមិត្តរួមក្រុមបញ្ចប់ទីចំនួន ៦ ដងក្នុងការបង្ហាញខ្លួនចំនួន ១៥ ប្រកួតសម្រាប់ក្រុម Liverpool នៅគ្រប់ការប្រកួតទាំងអស់។ ទម្រង់លេងដ៏មិនគួរឲ្យជឿរបស់ Mohamed Salah បានធ្វើឲ្យគាត់ឈ្នះពានកីឡាករឆ្នើមប្រចាំក្របខ័ណ្ឌ Premier League និងពានរង្វាន់ Goal of the Month សម្រាប់ខែតុលា។
គូប្រជែងដ៏កាចសាហាវរបស់ពួកគេគឺ Real Madrid កំពុងតាមប្រមាញ់កីឡាករ Erling Haaland និង Kylian Mbappe ។ Barcelona ចង់ចូលរួមជាមួយនឹងការចុះហត្ថលេខាលើកីឡាករកំពូលម្នាក់សម្រាប់ពួកគេដែរ។ Xavi ចង់នាំយកខ្សែប្រយុទ្ធថ្មី បន្ទាប់ពីតារាឆ្នើមរបស់ Barcelona គឺ Lionel Messi និង Antoine Griezmann បានចាកចេញកាលពីដើមរដូវក្តៅនេះ។
ការប្រកួតរបស់ Mohamed Salah គឺស្រដៀងគ្នាខ្លាំងណាស់បើប្រៀបធៀបទៅនឹង Lionel Messi ។ ខ្សែប្រយុទ្ធរបស់ Liverpool ប្រើជើងឆ្វេង ព្រមទាំងចូលចិត្តអូសញាក់ និងបញ្ជូនបាល់ ស្រដៀងនឹងម្ចាស់ពាន Ballon d’Or ៦សម័យដែរ។
Mohamed Salah មិនមែនជាកីឡាករ Liverpool តែម្នាក់គត់ដែល Xavi ចង់នាំមក Barcelona នោះទេ។ គ្រូបង្វឹកវ័យ ៤១ ឆ្នាំរូបនេះក៏ចង់រួបរួមគ្នាជាមួយ Thiago Alcantara នៅ Nou Camp ផងដែរ៕
សូមទស្សនាវីដេអូខាងក្រោម៖
